មន្ត្រីជាន់ខ្ពស់រដ្ឋាភិបាលអាមេរិកបានព្រមានថា ប្រទេសកាណាដានឹងសោកស្តាយចំពោះការសម្រេចចិត្តអនុញ្ញាតឱ្យនាំចូលរថយន្តអគ្គិសនី (EV) របស់ចិនចំនួនរហូតដល់ 49,000 គ្រឿង ជាមួយអត្រាពន្ធទាប បើប្រៀបធៀបនឹងគោលនយោបាយតឹងរ៉ឹងរបស់ទីក្រុងវ៉ាស៊ីនតោន។
ប្រភពពីសារព័ត៌មានAl Jazeera នៅថ្ងៃទី១៧ខែមករា។
ការព្រមាននេះត្រូវបានធ្វើឡើង បន្ទាប់ពីនាយករដ្ឋមន្ត្រីកាណាដា លោក Mark Carney បានប្រកាសកិច្ចព្រមព្រៀងពាណិជ្ជកម្មជាមួយប្រទេសចិន ដែលអនុញ្ញាតឱ្យ EV ចិនចូលទីផ្សារកាណាដាក្រោមពន្ធទាបជាងមុន បន្ទាប់ពីកាណាដាធ្លាប់ដាក់ពន្ធ 100 ភាគរយលើ EV ចិនក្នុងឆ្នាំ 2024។
រដ្ឋមន្ត្រីក្រសួងដឹកជញ្ជូនសហរដ្ឋអាមេរិក លោក Sean Duffy បាននិយាយថា ការសម្រេចចិត្តនេះជាបញ្ហា និងអាចផ្តល់អត្ថប្រយោជន៍ដល់ចិនក្នុងទីផ្សារអាមេរិកខាងជើង។ លោកបានបញ្ជាក់ថា រថយន្ត EV ចិនដែលចូលទៅកាណាដា នឹងមិនត្រូវបានអនុញ្ញាតឱ្យចូលសហរដ្ឋអាមេរិកឡើយ ដោយសារពន្ធ និងវិធានការការពារឧស្សាហកម្មក្នុងស្រុក។
ខណៈដែលមន្ត្រីពាណិជ្ជកម្មសហរដ្ឋអាមេរិកអះអាងថា ចំនួនរថយន្តមានកំណត់នេះមិនប៉ះពាល់ដល់ក្រុមហ៊ុនរថយន្តអាមេរិកនោះទេ ក្តីបារម្ភនៅទីក្រុងវ៉ាស៊ីនតោននៅតែមានថា កិច្ចព្រមព្រៀងនេះអាចបង្កើនឥទ្ធិពលរបស់ចិននៅតំបន់៕