សេតវិមានបានបញ្ជាក់ថា ប្រធានាធិបតីសហរដ្ឋអាមេរិក លោក Donald Trump មានគម្រោងលើកលែងទោសដល់អតីតអភិបាលរដ្ឋ Puerto Rico លោកស្រី Wanda Vazquez Garced ដែលបានសារភាពកំហុសក្នុងករណីសូកប៉ាន់ពាក់ព័ន្ធនឹងយុទ្ធនាការបោះឆ្នោត។
ប្រភពពីសារព័ត៌មានAl Jazeera នៅថ្ងៃទី១៧ខែមករាឆ្នាំ២០២៦។
លោកស្រី Vazquez បានទទួលយកកិច្ចព្រមព្រៀងសារភាពកំហុសនៅឆ្នាំ 2025 បន្ទាប់ពីត្រូវបានចោទប្រកាន់ពីបទចូលរួមក្នុងគម្រោងពុករលួយ ខណៈកំពុងកាន់តំណែងអភិបាលរដ្ឋ។ ព្រះរាជអាជ្ញាសហព័ន្ធបានអះអាងថា នាងបានសន្យាបណ្តេញមន្ត្រីជាន់ខ្ពស់ម្នាក់ ជាថ្នូរនឹងការគាំទ្រហិរញ្ញវត្ថុសម្រាប់យុទ្ធនាការបោះឆ្នោតឆ្នាំ 2020 របស់នាង។
យ៉ាងណាមិញ ការសម្រេចចិត្តនេះបានបង្កឱ្យមានការរិះគន់យ៉ាងខ្លាំងពីមន្ត្រីនយោបាយនៅ Puerto Rico ដែលព្រមានថា ការលើកលែងទោសអតីតមេដឹកនាំដែលបានសារភាពកំហុសពុករលួយ អាចធ្វើឱ្យខូចទំនុកចិត្តសាធារណៈ និងលើកទឹកចិត្តអំពើពុករលួយ៕