ការវាយប្រហារដោយដ្រូននិងមីស៊ីលរបស់រុស្ស៊ីពេញមួយយប់ បានធ្វើឱ្យទីក្រុងគៀវស្ទើរពាក់កណ្តាលគ្មានកំដៅ និងថាមពល ខណៈសីតុណ្ហភាពធ្លាក់ចុះដល់ -14 អង្សាសេ កាលពីថ្ងៃទី 20 ខែមករា ឆ្នាំ 2026។ អគារលំនៅដ្ឋានរាប់ពាន់ខ្នង រួមទាំងអគាររដ្ឋសភា ត្រូវបានផ្តាច់ទឹក និងថាមពល បន្ទាប់ពីហេដ្ឋារចនាសម្ព័ន្ធថាមពលត្រូវបានបំផ្លាញជាបន្តបន្ទាប់។
ប្រភពពីសារព័ត៌មានAFP។
ការវាយប្រហារនេះបានសម្លាប់មនុស្សយ៉ាងហោចណាស់ម្នាក់នៅជិតរដ្ឋធានី ខណៈប្រព័ន្ធការពារដែនអាកាសអ៊ុយក្រែនបានឆ្លើយតបនឹងដ្រូននិងមីស៊ីលរាប់រយគ្រឿង។ អាជ្ញាធរអ៊ុយក្រែនបានបញ្ជាក់ថា រុស្ស៊ីបានបាញ់ដ្រូនប្រហែល 339 គ្រឿង និងមីស៊ីល 34 គ្រាប់ ក្នុងការវាយប្រហាពេញយប់តែម្ដង។
អភិបាលក្រុងគៀវ Vitali Klitschko បាននិយាយថា មនុស្សជាងកន្លះលាននាក់បានជម្លៀសចេញពីរដ្ឋធានីក្នុងខែនេះ ដោយសារការវាយប្រហារខ្លាំងបំផុតលើហេដ្ឋារចនាសម្ព័ន្ធថាមពលតាំងពីសង្គ្រាមចាប់ផ្តើម។ ប្រជាពលរដ្ឋជាច្រើនបានជ្រកកោននៅស្ថានីយ៍រថភ្លើងក្រោមដី ដើម្បីគេចពីការបំផ្ទុះ និងភាពត្រជាក់ខ្លាំង។
រដ្ឋមន្ត្រីការបរទេសអ៊ុយក្រែន Andriy Sybiga បានរិះគន់ប្រធានាធិបតីរុស្ស៊ី Vladimir Putin ដោយចោទប្រកាន់ថា កំពុងកំណត់គោលដៅលើហេដ្ឋារចនាសម្ព័ន្ធស៊ីវិល និងអំពាវនាវឱ្យសម្ព័ន្ធមិត្តពង្រឹងប្រព័ន្ធការពារដែនអាកាស៕