កងកម្លាំងអ៊ុយក្រែនបានវាយប្រហារដោយជោគជ័យទៅលើឃ្លាំងដ្រូនរបស់រុស្ស៊ីមួយកន្លែងនៅក្នុងតំបន់ Luhansk ដែលកំពុងស្ថិតក្រោមការកាន់កាប់របស់រុស្ស៊ី កាលពីថ្ងៃទី ១៩ ខែមករា។
ការវាយប្រហារនេះបានកើតឡើងនៅយប់ថ្ងៃទី ១៩ ខែមករា ដោយអ៊ុយក្រែនបានកំណត់គោលដៅយ៉ាងច្បាស់លាស់ទៅលើទីតាំងឃ្លាំងផ្ទុកដ្រូនរបស់រុស្ស៊ី ដែលមានទីតាំងនៅភូមិ Novokrasnianka ក្នុងតំបន់ Luhansk។ ឃ្លាំងដ្រូននេះស្ថិតក្រោមការគ្រប់គ្រងរបស់កងកាំភ្លើងធំលេខ ១៤៤ របស់រុស្ស៊ី។
អគ្គសេនាធិការអ៊ុយក្រែនក៏បានបញ្ជាក់ផងដែរថា កងកម្លាំងអ៊ុយក្រែនបានបើកការវាយប្រហារផ្សេងទៀតទៅលើឃ្លាំងស្តុកប្រេង និងហេដ្ឋារចនាសម្ព័ន្ធថាមពលសំខាន់ៗនៅក្នុងទឹកដីរុស្ស៊ី។
គួរបញ្ជាក់ថា បច្ចុប្បន្នរុស្ស៊ីគ្រប់គ្រងបានស្ទើរតែទាំងស្រុងនៃតំបន់ Luhansk ដែលជាសមរភូមិសំខាន់មួយចាប់តាំងពីឆ្នាំ ២០១៤ បន្ទាប់ពីរុស្ស៊ីបានបើកសង្គ្រាម Donbas និងឈ្លានពានភាគខាងកើតប្រទេសអ៊ុយក្រែន។ ក្នុងរយៈពេលមួយឆ្នាំចុងក្រោយនេះ អ៊ុយក្រែនបានបង្កើនយុទ្ធសាស្ត្រវាយប្រហាររបស់ខ្លួនទៅលើមូលដ្ឋានយោធា និងឧស្សាហកម្មនៅក្នុងប្រទេសរុស្ស៊ី និងតំបន់ដែលរុស្ស៊ីកាន់កាប់ ដោយពឹងផ្អែកជាចម្បងលើដ្រូនដែលផលិតក្នុងស្រុក៕