ទីក្រុងគៀវ កំពុងប្រឈមនឹងការត្រជាក់ខ្លាំង ខណៈប្រជាជនត្រូវស្វែងរកភាពកក់ក្តៅនៅក្នុងរថភ្លើង តង់ និងមជ្ឈមណ្ឌលជួយសង្គ្រោះ បន្ទាប់ពីរុស្ស៊ីបន្តវាយប្រហារលើហេដ្ឋារចនាសម្ព័ន្ធថាមពល។ អាជ្ញាធរអ៊ុយក្រែនបានហៅការវាយប្រហារនេះថាជាភេរវកម្មថាមពល។
ប្រភពពីសារព័ត៌មានAFP នៅថ្ងៃទី២៣ខែមករា។
ការវាយប្រហារដោយដ្រូននិងមីស៊ីល បានបណ្តាលឱ្យមានការដាច់ចរន្តអគ្គិសនី និងប្រព័ន្ធកំដៅ ក្នុងអំឡុងពេលរដូវរងាដ៏លំបាកបំផុត។ ប្រជាពលរដ្ឋជាច្រើន រួមទាំងគ្រួសារដែលមានកុមារ និងមនុស្សចាស់ ត្រូវពឹងផ្អែកលើអាជ្ញាធរដើម្បីទទួលបានកំដៅ អគ្គិសនី និងអាហារក្តៅ។
ក្រសួងសុខាភិបាលអ៊ុយក្រែនឲ្យដឹងថា ចាប់តាំងពីចុងខែធ្នូមនុស្សជាង ១.០០០ នាក់ ត្រូវបានបញ្ជូនទៅមន្ទីរពេទ្យ ដោយសារអាការៈត្រជាក់ខ្លាំង និងការថយចុះកម្តៅ ខណៈអាជ្ញាធរព្រមានថា ស្ថានភាពអាចកាន់តែអាក្រក់ ប្រសិនបើអាកាសធាតុត្រជាក់នៅតែបន្ត៕