ប្រធានាធិបតីសហរដ្ឋអាមេរិក លោកDonald Trump បាននិយាយថាកងទ័ពជើងទឹកអាមេរិកដ៏ធំកំពុងធ្វើដំណើរឆ្ពោះទៅកាន់តំបន់ឈូងសមុទ្រ ដោយមានអ៊ីរ៉ង់ជាចំណុចកណ្តាល ខណៈភាពតានតឹងជាមួយទីក្រុងតេអេរ៉ង់កើនឡើង។ លោកបានបញ្ជាក់ថា សហរដ្ឋអាមេរិកកំពុងតាមដានអ៊ីរ៉ង់យ៉ាងដិតដល់។
ប្រភពពីសារព័ត៌មានAl Jazeera នៅថ្ងៃទី២៣ខែមករា។
ការលើកឡើងនេះធ្វើឡើងនៅលើយន្តហោះ Air Force One បន្ទាប់ពីលោកត្រឡប់ពីវេទិកាសេដ្ឋកិច្ចពិភពលោកនៅទីក្រុង Davos។ លោក Trump បាននិយាយថា កប៉ាល់ និងកងនាវាច្រើនកំពុងត្រូវបានដាក់ពង្រាយទៅតំបន់នេះ ក្នុងករណីមានភាពចាំបាច់ ប៉ុន្តែប្រហែលជាមិនត្រូវប្រើប្រាស់កម្លាំងឡើយ។
ការប្រកាសនេះកើតឡើងបន្ទាប់ពីសារព័ត៌មានអាមេរិករាយការណ៍ថា នាវាផ្ទុកយន្តហោះ USS Abraham Lincoln និងក្រុមនាវាវាយប្រហាររបស់ខ្លួន ត្រូវបានបង្វែរពីតំបន់អាស៊ីទៅមជ្ឈិមបូព៌ា។ លោក Trump ក៏បានអះអាងថា ការគំរាមកំហែងពីមុនរបស់លោក បានជួយរារាំងអ៊ីរ៉ង់ពីការប្រហារជីវិតអ្នកតវ៉ាជាច្រើនរយនាក់ ហើយលោកនៅតែបើកចំហចំពោះការចរចាជាមួយថ្នាក់ដឹកនាំអ៊ីរ៉ង់៕