កងកម្លាំងជើងទឹកបារាំងបានស្ទាក់ចាប់ និងបង្វែរទិសដៅកប៉ាល់ ដឹកប្រេង Grinch ដែលមានទំនាក់ទំនងជាមួយរុស្ស៊ី ឆ្ពោះទៅកំពង់ផែ Marseille-Fos ដើម្បីធ្វើការស៊ើបអង្កេតបន្ថែម។ ព្រះរាជអាជ្ញាបារាំងបានបញ្ជាក់ថា កប៉ាល់នេះកំពុងស្ថិតក្រោមការពិនិត្យផ្នែកច្បាប់សមុទ្រ។
ប្រភពពីសារព័ត៌មានAl Jazeera នៅថ្ងៃទី២៤ខែមករា។
ការស្ទាក់ចាប់បានកើតឡើងនៅសមុទ្រមេឌីទែរ៉ាណេខាងលិច រវាងឆ្នេរភាគខាងត្បូងអេស្ប៉ាញ និងភាគខាងជើងម៉ារ៉ុក ដោយមានការគាំទ្រពីកងទ័ពជើងទឹកប្រទេសដទៃទៀត រួមទាំងចក្រភពអង់គ្លេស។ វីដេអូពីយោធាបារាំងបង្ហាញថា ទាហានបានចុះពីឧទ្ធម្ភាគចក្រឡើងលើនាវា។
នាវា Grinch ដែលធ្វើដំណើរក្រោមទង់ជាតិកូម៉ូរ៉ូស បានចាកចេញពីកំពង់ផែ Murmansk របស់រុស្ស៊ី និងត្រូវបានសង្ស័យថាជាផ្នែកនៃកងនាវាស្រមោលដែលរុស្ស៊ីប្រើប្រាស់ដើម្បីនាំចេញប្រេងជៀសវាងទណ្ឌកម្មអន្តរជាតិ ដែលដាក់បន្ទាប់ពីសង្គ្រាមលើអ៊ុយក្រែន៕