កាលពីថ្ងៃទី 24 ខែមករា ឆ្នាំ 2026 កិច្ចចរចាលើកទីពីររវាងរុស្ស៊ី និងអ៊ុយក្រែន ដែលសម្របសម្រួលដោយសហរដ្ឋអាមេរិក នៅទីក្រុង Abu Dhabiនៃប្រទេសអារ៉ាប់រួម បានបញ្ចប់ដោយមិនមានកិច្ចព្រមព្រៀងណាមួយ ទោះបីភាគីទាំងពីរបានបង្ហាញភាពបើកចំហសម្រាប់ការសន្ទនាបន្តទៀតក៏ដោយ។
ប្រភពពីសារព័ត៌មានAl Jazeera។
ប្រធានាធិបតីអ៊ុយក្រែន Volodymyr Zelenskyy បានថ្លែងថា កិច្ចពិភាក្សានេះផ្តោតលើប៉ារ៉ាម៉ែត្រសម្រាប់បញ្ចប់សង្គ្រាម និងលក្ខខណ្ឌសន្តិសុខចាំបាច់ ដោយបញ្ជាក់ថា ការចរចាបន្ថែមអាចធ្វើឡើងនៅដើមសប្តាហ៍ក្រោយ។ កិច្ចចរចានេះមានការចូលរួមពីមន្ត្រីជាន់ខ្ពស់អ៊ុយក្រែន រុស្ស៊ី និងបេសកជនអាមេរិក។
ទោះជាយ៉ាងណា មុនពេលចរចា ការវាយប្រហាររបស់រុស្ស៊ីលើហេដ្ឋារចនាសម្ព័ន្ធថាមពលអ៊ុយក្រែនបានបន្តឡើងវិញ ដោយកាត់ផ្តាច់មនុស្សប្រមាណ 1.2 លាននាក់ពីអគ្គិសនី ក្នុងស្ថានភាពសីតុណ្ហភាពក្រោមសូន្យ បង្កើនវិបត្តិមនុស្សធម៌នៅប្រទេសអ៊ុយក្រែន៕