អ៊ីរ៉ង់ ត្រូវបានរាយការណ៍ថា បានដឹកជញ្ជូនប្រេងឥន្ធនៈយន្តហោះក្នុងបរិមាណធំទៅកាន់យោធាមីយ៉ាន់ម៉ាដោយសម្ងាត់ តាមរយៈកងនាវាស្រមោល។
ការផ្គត់ផ្គង់នេះកើតឡើងនៅពេលដែលរបបយោធាមីយ៉ាន់ម៉ាកំពុងបង្កើនការវាយប្រហារតាមអាកាស និងការទម្លាក់គ្រាប់បែកលើគោលដៅស៊ីវិលនៅទូទាំងប្រទេស។
ប្រភពពីសារព័ត៌មានReuters នៅថ្ងៃទី២៧ ខែមករា។
ក្រៅពីប្រេងឥន្ធនៈយន្តហោះ អ៊ីរ៉ង់ក៏ត្រូវបានគេរាយការណ៍ថា ផ្គត់ផ្គង់អ៊ុយរ៉េ ដែលជាគ្រឿងផ្សំសំខាន់សម្រាប់ផលិតគ្រាប់រំសេវ ដល់យោធាមីយ៉ាន់ម៉ាផងដែរ។ អ្នកវិភាគចាត់ទុកថា អ៊ីរ៉ង់កំពុងក្លាយជាអ្នកផ្គត់ផ្គង់យុទ្ធសាស្ត្រសំខាន់មួយ ដែលជួយអោយរបបយោធាមីយ៉ាន់ម៉ាអាចបន្តសង្គ្រាមផ្លូវអាកាសរបស់ខ្លួនបាន។
ការដឹកជញ្ជូនទាំងនេះត្រូវបានគេចោទប្រកាន់ថា រំលោភលើទណ្ឌកម្មរបស់ប្រទេសលោកខាងលិច ដែលបានដាក់លើទាំងអ៊ីរ៉ង់ និងមីយ៉ាន់ម៉ា ហើយកំពុងបង្កើនការព្រួយបារម្ភអន្តរជាតិអំពីការពង្រីកបណ្តាញជួញដូរយោធាសម្ងាត់ និងផលប៉ះពាល់ដល់សន្តិសុខតំបន់៕