សកម្មជនសិទ្ធិមនុស្សបានរាយការណ៍ថា យ៉ាងហោចណាស់មនុស្ស ៦.១២៦ នាក់ត្រូវបានសម្លាប់ ក្នុងការបង្ក្រាបដ៏ឃោរឃៅរបស់អាជ្ញាធរអ៊ីរ៉ង់លើការតវ៉ាទូទាំងប្រទេស ខណៈដែលមានមនុស្សជាច្រើនទៀតត្រូវបានគេជឿថាបានស្លាប់ ប៉ុន្តែមិនទាន់អាចបញ្ជាក់បាន។
ប្រភពពីសារព័ត៌មានAP នៅថ្ងៃទី២៧ខែមករា។
ក្នុងពេលតែមួយ សហរដ្ឋអាមេរិកបានបញ្ជូននាវាផ្ទុកយន្តហោះ USS Abraham Lincoln និងនាវាពិឃាតអមដំណើរមកដល់តំបន់មជ្ឈិមបូព៌ា ដើម្បីបង្កើនសម្ពាធយោធាលើអ៊ីរ៉ង់ ចំពោះវិបត្តិនេះ។ ទោះជាយ៉ាងណា ប្រទេសអារ៉ាប់នៅឈូងសមុទ្រមួយចំនួនបានបង្ហាញការស្ទាក់ស្ទើរក្នុងការចូលរួមការវាយប្រហារណាមួយ។
ជាមួយគ្នានេះ កងជីវពលមួយចំនួនដែលគាំទ្រដោយអ៊ីរ៉ង់នៅតំបន់មជ្ឈិមបូព៌ា បានបង្ហាញឆន្ទៈបើកការវាយប្រហារថ្មីៗ ដើម្បីគាំទ្រទីក្រុងតេអេរ៉ង់ បន្ទាប់ពីប្រធានាធិបតីអាមេរិក ដូណាល់ ត្រាំ បានគំរាមចាត់វិធានការយោធា ប្រសិនបើអ៊ីរ៉ង់បន្តសម្លាប់បាតុករ ឬអនុវត្តការប្រហារជីវិតទ្រង់ទ្រាយធំ៕