វៀតណាម និងសហភាពអឺរ៉ុប (EU) បានប្រកាសលើកកម្ពស់ទំនាក់ទំនងទៅជាភាពជាដៃគូយុទ្ធសាស្ត្រដ៏ទូលំទូលាយ ដែលជាកម្រិតការទូតខ្ពស់បំផុតរបស់វៀតណាម ខណៈពេលពាណិជ្ជកម្មសកលកំពុងរងឥទ្ធិពលពីសម្ពាធពន្ធគយរបស់សហរដ្ឋអាមេរិកក្រោមការដឹកនាំរបស់លោក Donald Trump។
ប្រភពពីសារព័ត៌មានAP នៅថ្ងៃទី២៩ខែមករា។
ការលើកកម្ពស់នេះធ្វើឲ្យ EU ស្ថិតនៅលើមូលដ្ឋានការទូតដូចគ្នានឹងសហរដ្ឋអាមេរិក ចិន និងរុស្ស៊ី ហើយត្រូវបានប្រកាសក្នុងអំឡុងដំណើរទស្សនកិច្ចរបស់ប្រធានក្រុមប្រឹក្សាអឺរ៉ុប លោក Antonio Costa ទៅកាន់ទីក្រុងហាណូយ។ លោក Costa បានបញ្ជាក់ថា ភាពជាដៃគូថ្មីនេះមានគោលបំណងពង្រឹងការសហការលើមូលដ្ឋានច្បាប់អន្តរជាតិ និងលើកកម្ពស់វិបុលភាពរួម។
ប្រធានាធិបតីវៀតណាម លោក Luong Cuong បានពិពណ៌នាចលនានេះថាជា “ព្រឹត្តិការណ៍ប្រវត្តិសាស្ត្រ” ដែលបង្ហាញពីការកើនឡើងនៃតួនាទីវៀតណាមលើឆាកអន្តរជាតិ៕