កាលពី(ថ្ងៃទី១ ខែកុម្ភៈ)ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយថា រូបលោករំពឹងទុកថា នឹងឈានដល់កិច្ចព្រមព្រៀងជាមួយអ៊ីរ៉ង់។
បន្ទាប់ពីមេដឹកនាំកំពូលរបស់សាធារណរដ្ឋអ៊ីស្លាម បានព្រមានថា ការវាយប្រហារណាមួយរបស់អាមេរិកលើអ៊ីរ៉ង់ នឹងបង្កឱ្យផ្ទុះសង្រ្គាមក្នុងតំបន់។
សារព័ត៌មានAFP។
នៅពេលសួរអំពីសារព្រមានរបស់លោក Ayatollah Ali Khamenei ដែលជាមេដឹកនាំកំពូលអ៊ីរ៉ង់ ។
លោក ត្រាំ បានឆ្លើយប្រាប់ក្រុមអ្នកសារព័ត៌មានថា ប្រាកដណាស់ លោក Khamenei ច្បាស់ជានឹងនិយាយបែបនោះ ហើយលោកប្រធានាធិបតីអាមេរិក បានបន្ថែមថា សង្ឃឹមថាយើងនឹងអាចឈានដល់កិច្ចព្រមព្រៀងមួយ ព្រោះថាបើមិនដូច្នោះទេ នោះយើងនឹងដឹងច្បាស់មិនខានថា តើគាត់ (លោក Khamenei) និយាយត្រូវដែរឬអត់។
សហរដ្ឋអាមេរិក បានបង្កើនវត្តមានកងកម្លាំងយោធាជើងទឹករបស់ខ្លួន នៅតំបន់មជ្ឈិមបូព៌ា ។
បន្ទាប់ពីលោក ត្រាំ បានគំរាមម្តងហើយម្តងទៀតថា នឹងធ្វើអន្តរាគមន៍យោធាលើអ៊ីរ៉ង់ ប្រសិនបើអ៊ីរ៉ង់មិនព្រមចរចាកិច្ចព្រមព្រៀងនុយក្លេអ៊ែរ ឬមិនបញ្ឈប់ការសម្លាប់ក្រុមបាតុករ៕