នៅថ្ងៃសុក្រ ទី៦ ខែកុម្ភៈ ឆ្នាំ២០២៦ អ៊ីរ៉ង់ និងសហរដ្ឋអាមេរិកបានចាប់ផ្តើមដំណើរការកិច្ចពិភាក្សានៅទីក្រុង Muscat របស់ប្រទេសអូម៉ង់ ដោយមានអូម៉ង់ធ្វើជាអ្នកសម្របសម្រួល ខណៈភាពតានតឹងនយោបាយ និងយោធារវាងភាគីទាំងពីរកំពុងកើនឡើង។
ប្រភពពីសារព័ត៌មានReuters។
អ៊ីរ៉ង់បានបញ្ជាក់ថា ខ្លួនចង់ឱ្យការចរចាផ្តោតតែលើបញ្ហាកម្មវិធីនុយក្លេអ៊ែរ ប៉ុន្តែសហរដ្ឋអាមេរិកចង់ពង្រីករបៀបវារៈទៅលើមីស៊ីលផ្លោង ការគាំទ្រក្រុមប្រដាប់អាវុធក្នុងតំបន់ និងស្ថានភាពសិទ្ធិមនុស្សនៅអ៊ីរ៉ង់។ ភាពខុសគ្នានេះត្រូវបានគេមើលឃើញថា អាចរារាំងដំណើរការទូត និងបង្កហានិភ័យនៃជម្លោះថ្មីមួយនៅមជ្ឈិមបូព៌ា។
សូមបញ្ជាក់ថា៖ ការចរចានេះកើតឡើងក្នុងបរិបទនៃការដាក់ពង្រាយកងទ័ពជើងទឹកអាមេរិកនៅជិតអ៊ីរ៉ង់ និងបន្ទាប់ពីការបង្ក្រាបបាតុកម្មដ៏បង្ហូរឈាមនៅក្នុងប្រទេសអ៊ីរ៉ង់កាលពីខែមុន។ ថ្នាក់ដឹកនាំទីក្រុងតេអេរ៉ង់បានបង្ហាញការព្រួយបារម្ភថា ប្រធានាធិបតីអាមេរិក លោក Donald Trump អាចជ្រើសរើសជម្រើសយោធា ប្រសិនបើការទូតបរាជ័យ៕