ប្រធានរដ្ឋសភាវេណេស៊ុយអេឡា លោក Jorge Rodriguez បានប្រកាសថា រដ្ឋាភិបាលនឹងដោះលែងអ្នកទោសនយោបាយទាំងអស់ មិនឱ្យលើសពីថ្ងៃទី 13 ខែកុម្ភៈ ឆ្នាំ 2026។ លោកបានប្រាប់សមាជិកគ្រួសារអ្នកទោសថា ការដោះលែងនេះនឹងកើតឡើងក្នុងរយៈពេលពីថ្ងៃអង្គារដល់ថ្ងៃសុក្រខាងមុខ។
ប្រភពពីសារព័ត៌មានAl Jazeera នៅថ្ងៃទី៧ខែកុម្ភៈ។
ការប្រកាសនេះត្រូវបានមើលឃើញថា ជាជំហានវិជ្ជមានក្នុងការកែលម្អស្ថានភាពសិទ្ធិមនុស្ស ដែលត្រូវបានរិះគន់យ៉ាងខ្លាំងក្រោមការដឹកនាំរបស់អតីតប្រធានាធិបតី Nicolas Maduro ទោះជាយ៉ាងណា អ្នករិះគន់នៅតែមានការសង្ស័យចំពោះការសន្យារបស់រដ្ឋាភិបាល។
ការប្រកាសរបស់លោក Rodriguez កើតឡើង បន្ទាប់ពីរដ្ឋសភាបានអនុម័តសេចក្តីព្រាងច្បាប់លើកលែងទោសក្នុងការបោះឆ្នោតលើកដំបូង។ ច្បាប់នេះមានគោលបំណងលើកលែងទោសដល់អ្នកដែលត្រូវបានចោទប្រកាន់ ឬកាត់ទោសពីបទឧក្រិដ្ឋទាក់ទងនឹងនយោបាយ និងការតវ៉ា ហើយក៏នឹងលុបចោលការហាមឃាត់មិនឱ្យមេដឹកនាំប្រឆាំងមួយចំនួនចូលរួមនយោបាយផងដែរ៕