ថ្ងៃទី១០ ខែកុម្ភៈ អង្គការមូលនិធិកុមារ UNICEF បាននិយាយថា កុមារជាង២០០លាននាក់ នៅតាមប្រទេសជាង១៣០ ត្រូវការជំនួយមនុស្សធម៌ក្នុងឆ្នាំ២០២៦។
សារព័ត៌មាន Anadolu។
ប្រធានអង្គការ UNICEF លោកស្រី Catherine Russell បាននិយាយថា វិសាលភាពនិងភាពស្មុគស្មាញ នៃបញ្ហាដែលកុមារនៅលើពិភពលោក កំពុងតែប្រឈម ។
គឺកាន់តែរីកធំឡើងៗ ដោយសារតែជម្លោះ ការប្រែប្រួលអាកាសធាតុ អស្ថិរភាពសេដ្ឋកិច្ច និងវិសមភាព។
លោកស្រី Russell បានលើកឡើងថា ស្ថានការណ៍មនុស្សធម៌ ដែលកុមារកំពុងប្រឈមនាពេលនេះ គឺមានសភាពធ្ងន់ធ្ងរបំផុតមួយ ។
ខណៈកុមារជាង២០០លាននាក់ នៅតាមប្រទេសសរុបជាង១៣០ ត្រូវការជំនួយមនុស្សធម៌ក្នុងឆ្នាំនេះ។
លោកស្រីបន្តថា បរិយាកាសពិភពលោកសម្រាប់កុមារ បាននិងកំពុងបង្កការលំបាកកាន់តែខ្លាំង ដោយសម្ពាធកើនលើគ្រួសារនិងសហគមន៍ ស្របពេលតម្រូវការកើនឡើង ហើយធនធានថយចុះ។
លោកស្រីព្រមានថា វឌ្ឍនភាពរាប់ទសវត្សរ៍នៃការរស់រានមានជីវិតរបស់កុមារ ឥឡូវកំពុងស្ថិតក្រោមហានិភ័យដើរថយក្រោយវិញ ដ្បិតឆ្នាំ២០២៥ អាចជាឆ្នាំដំបូងក្នុងសតវត្សរ៍នេះ ដែលអត្រាមរណៈកុមារកើនឡើង។
លោកស្រីបន្ថែមថា តម្រូវការកើនឡើង តែបែរជាមានការកាត់បន្ថយមូលនិធិធំៗនិងភ្លាមៗ ។
ដែលដាក់បន្ទុកជម្រើសដ៏លំបាកបំផុតសម្រាប់ប្រតិបត្តិការមនុស្សធម៌ ពោលគឺត្រូវជ្រើសរើសជីវិតមួយណា ដែលគួរផ្តោតអាទិភាព ។
ដោយសារតែធនធានមានកំណត់ ខណៈការផ្តល់សេវាកម្មនិងអន្តរាគមន៍ ដែលកុមារពឹងផ្អែកលើដើម្បីរស់រាន ត្រូវបានកាត់បន្ថយ។
លោកស្រី Russell គូសបញ្ជាក់ថា UNICEF ធ្វើប្រតិបត្តិការនៅប្រទេសនិងដែនដីជាង១៩០ ហើយអំពាវនាវឱ្យមានភាពជាដៃគូ និងកំណែទម្រង់រឹងមាំជាងមុន ដើម្បីរក្សានិរន្តរភាពនៃការងារដែលសង្រ្គោះអាយុជីវិត៕