កងកម្លាំងយោធា សហរដ្ឋអាមេរិក បានបើកការវាយប្រហារសងសឹកលើគោលដៅ របស់ ក្រុម ISIL (ឬ ISIS) រាប់សិបកន្លែង នៅក្នុងប្រទេសស៊ីរី បន្ទាប់ពីការសម្លាប់ទាហានអាមេរិកពីរនាក់ និងអ្នកបកប្រែម្នាក់ កាលពីខែធ្នូ ឆ្នាំមុន។
ប្រភពពីសារព័ត៌មានAl Jazeera នៅថ្ងៃទី១៥ខែកុម្ភៈ។
បញ្ជាការកណ្តាលអាមេរិក United States Central Command (CENTCOM) បានឱ្យដឹងថា ចន្លោះថ្ងៃទី ៣ ដល់ ១២ ខែកុម្ភៈ កងកម្លាំងខ្លួនបានវាយប្រហារគោលដៅ លើISIL ជាង៣០កន្លែង ដោយប្រើគ្រាប់រំសេវដើម្បីបំផ្លាញហេដ្ឋារចនាសម្ព័ន្ធ និងឃ្លាំងអាវុធរបស់ក្រុមនេះ។
ការវាយប្រហារនេះធ្វើឡើងបន្ទាប់ពីក្រុម ISIL បានបើកការវាយប្រហារលើកងកម្លាំងអាមេរិក និងស៊ីរីនៅជិតទីក្រុង Palmyra បណ្តាលឱ្យស្លាប់ពលបាលឯក Edgar Brian Torres-Tovar, William Nathaniel Howard និងអ្នកបកប្រែស៊ីវិល Ayad Mansoor Sakat។
សូមបញ្ជាក់ថា៖ ក្នុងពេលដូចគ្នា សហរដ្ឋអាមេរិកបានបញ្ចប់ការផ្ទេរអ្នកទោស ISIL រាប់ពាន់នាក់ពីស៊ីរីទៅកាន់ប្រទេសអ៊ីរ៉ាក់តាមសំណើរបស់រដ្ឋាភិបាលទីក្រុងបាកដាដ ដើម្បីឱ្យតុលាការអ៊ីរ៉ាក់ដោះស្រាយតាមច្បាប់៕