នៅថ្ងៃទី19 ខែកុម្ភៈ ឆ្នាំ2026 តុលាការកូរ៉េខាងត្បូង បានកាត់ទោសអតីតប្រធានាធិបតី លោកYoon Suk Yeol ឲ្យជាប់ពន្ធនាគារអស់មួយជីវិត ពីបទដឹកនាំការបះបោរ ទាក់ទងនឹងការប៉ុនប៉ងដាក់ច្បាប់អាជ្ញាសឹកកាលពីខែធ្នូ ឆ្នាំ 2024។
ប្រភពពីសារព័ត៌មានAnadolu Agency។
តុលាការ Seoul Central District Court បានសម្រេចថា សេចក្តីប្រកាសច្បាប់អាជ្ញាសឹករបស់លោក Yoon ស្មើនឹងអំពើបះបោរ ដោយបញ្ជាក់ថាលោកបានបញ្ជូនកងទ័ពទៅកាន់បរិវេណរដ្ឋសភា ក្នុងគោលបំណងរារាំងសមាជិកសភាពីការបោះឆ្នោតប្រឆាំងនឹងក្រឹត្យរបស់លោក។ សវនាការនេះត្រូវបានផ្សាយផ្ទាល់តាមទូរទស្សន៍ជាតិ។
ព្រះរាជអាជ្ញាបានស្នើសុំទោសប្រហារជីវិត ប៉ុន្តែតុលាការបានសម្រេចផ្តន្ទាទោសជាប់ពន្ធនាគារអស់មួយជីវិតវិញ។ ការប្រកាសច្បាប់អាជ្ញាសឹកកាលពីថ្ងៃទី 3 ខែធ្នូ ឆ្នាំ 2024 មានរយៈពេលប្រហែលប្រាំមួយម៉ោង មុនពេលត្រូវបានលុបចោល៕