នៅថ្ងៃទី២៣ ខែកុម្ភៈ ឆ្នាំ២០២៦ រុស្ស៊ី និងអ៊ុយក្រែនបានចោទប្រកាន់គ្នាទៅវិញទៅមកពីបទវាយប្រហារតាមអាកាសពេញមួយយប់ ដែលបណ្តាលឲ្យមនុស្សយ៉ាងហោចណាស់ ៣នាក់បានស្លាប់ និង៧នាក់រងរបួស ខណៈការប្រយុទ្ធនៅតែបន្តដោយគ្មានភាពធូរស្រាល។
ប្រភពពីសារព័ត៌មានAnadolu Agency។
ក្រសួងការពារជាតិរុស្ស៊ីអះអាងថា ប្រព័ន្ធការពារដែនអាកាសបានបាញ់ទម្លាក់ដ្រូនរបស់អ៊ុយក្រែនចំនួន ១៥២ គ្រឿង ក្នុងនោះ ៦៥ គ្រឿងនៅលើតំបន់ Belgorod ជិតព្រំដែន។
ចំណែកឯអ៊ុយក្រែនវិញ អះអាងថារុស្ស៊ីបានបាញ់មីស៊ីល និងយន្តហោះគ្មានមនុស្សបើកសរុប ១២៦ គ្រឿង ដោយ ១០៥ គ្រឿងត្រូវបានបំផ្លាញ។ នៅតំបន់ Odesa អភិបាល Oleh Kiper បានរាយការណ៍ថា មនុស្ស២នាក់ស្លាប់ និងយ៉ាងហោចណាស់៣នាក់រងរបួស បន្ទាប់ពីការវាយប្រហារលើហេដ្ឋារចនាសម្ព័ន្ធឧស្សាហកម្ម ថាមពល និងអគារស៊ីវិល។
នៅតំបន់ Zaporizhzhia អភិបាល Ivan Fedorov បញ្ជាក់ថា មនុស្សម្នាក់ស្លាប់ និងម្នាក់ទៀតរងរបួស ខណៈហេដ្ឋារចនាសម្ព័ន្ធឧស្សាហកម្មមួយរងការខូចខាត។
ការផ្ទៀងផ្ទាត់ដោយឯករាជ្យលើការអះអាងរបស់ភាគីទាំងពីរនៅតែពិបាក ដោយសារជម្លោះកំពុងបន្ត៕