លោកប្រធានាធិបតី វ្ល៉ាឌីមៀរ ពូទីន កាលពីថ្ងៃចន្ទ បាននិយាយថា ការពន្លឿនក្រុមនុយក្លេអ៊ែរ ចំនួន៣របស់រុស្ស៊ី គឺជាអាទិភាពដាច់ខាត ។
ខណៈដែលលោកបានគូសបញ្ជាក់ពីជំហររបស់ប្រទេស លើកម្មវិធីអាវុធរបស់ខ្លួន។
កាសែត Moscow Times បានរាយការណ៍ថា ដោយប្រារព្ធទិវាអ្នកការពារមាតុភូមិរបស់រុស្ស៊ី មេដឹកនាំរុស្ស៊ីរូបនេះ បាននិយាយអំពីការពង្រឹងសមត្ថភាពនុយក្លេអ៊ែររបស់ប្រទេស មុនពេលប្រគល់រង្វាន់រដ្ឋដល់មន្ត្រី ដែលពាក់ព័ន្ធនឹងការឈ្លានពានអ៊ុយក្រែន។
នៅក្នុងសុន្ទរកថា របស់លោក លោកពូទីន បានសំដៅទៅលើក្រុមនុយក្លេអ៊ែរបីរបស់រុស្ស៊ី ដែលជាប្រព័ន្ធបីជ្រុង របស់ប្រទេសសម្រាប់ផ្គត់ផ្គង់អាវុធនុយក្លេអ៊ែរ ដែលត្រូវបានរចនាឡើង ដើម្បីធានាបាននូវសមត្ថភាពវាយប្រហារលើកទីពីរដ៏គួរឱ្យទុកចិត្ត។
លោក ពូទីន បានពិពណ៌នាអំពីការអភិវឌ្ឍរបស់ខ្លួនថាជា«អាទិភាពដាច់ខាត»ដោយនិយាយថាវា «ធានាសន្តិសុខរបស់រុស្ស៊ី និងធានានូវការទប់ស្កាត់ជាយុទ្ធសាស្ត្រប្រកបដោយប្រសិទ្ធភាព និងតុល្យភាពនៃកងកម្លាំងនៅក្នុងពិភពលោក»។
លោក ពូទីន សង្កត់ធ្ងន់ថា ប្រទេសរបស់លោក នឹងបន្តពង្រឹងកងទ័ព និងកងទ័ពជើងទឹករបស់ខ្លួន ដោយ «គិតគូរពីការវិវត្តនៅក្នុងស្ថានភាពអន្តរជាតិ ដោយផ្អែកលើបទពិសោធន៍ប្រយុទ្ធដែលទទួលបាន» ក្នុងអំឡុងពេលសង្គ្រាមរុស្ស៊ី-អ៊ុយក្រែន។
លោកបានបន្ថែមថា រុស្ស៊ី ក៏នឹងបង្កើនសមត្ថភាពរបស់កងកម្លាំងប្រដាប់អាវុធផ្សេងទៀតយ៉ាងច្រើនផងដែរ ដោយបង្កើនការត្រៀមខ្លួនប្រយុទ្ធ ការចល័ត និងសមត្ថភាពក្នុងការធ្វើប្រតិបត្តិការក្នុងគ្រប់ស្ថានភាពទាំងអស់ សូម្បីតែស្ថានភាពដ៏លំបាកបំផុតក៏ដោយ។
លោកបន្ថែមថា ជាការពិតណាស់ យើងនឹងពន្លឿនការអភិវឌ្ឍប្រព័ន្ធទំនើបៗសម្រាប់កងកម្លាំងប្រដាប់អាវុធ។
ការកត់សម្គាល់របស់លោកពូទីន បានកើតឡើងបន្ទាប់ពីរុស្ស៊ី បានផ្អាកការចូលរួមរបស់ខ្លួន នៅក្នុងសន្ធិសញ្ញា New START នៅថ្ងៃទី 5 ខែកុម្ភៈ ឆ្នាំ 2023 ដែលជាកិច្ចព្រមព្រៀងគ្រប់គ្រងអាវុធនុយក្លេអ៊ែរចុងក្រោយដែលនៅសល់រវាងទីក្រុងមូស្គូ និងទីក្រុងវ៉ាស៊ីនតោន៕