លោក ដូណាល់ ត្រាំ ប្រធានាធិបតីអាមេរិក បានថ្លែងថា”ប្រសិនបើចាំបាច់អាមេរិក នឹងបញ្ជូនកងទ័ពថ្មើរជើងចូលទៅកាន់អ៊ីរ៉ង់។
ប្រភពពីកាសែតអាមេរិក New York Post កាលពីថ្ងៃទី២ ខែមីនា ឆ្នាំ២០២៦។
ក្នុងកិច្ចសម្ភាសន៍ជាមួយ New York Post លោក ត្រាំ បានលើកឡើងថា «ខ្ញុំមិនភ័យបារម្ភអ្វីទេ ពាក់ព័ន្ធនឹងការបញ្ជូនកងទ័ពថ្មើរជើង។
គ្រប់ប្រធានាធិបតីអាមេរិកសុទ្ធតែ និយាយថា វានឹងមិនមានវត្តមានកងទ័ពថ្មើរជើងទេ។
ប៉ុន្តែខ្ញុំនឹងមិននិយាយបែបនេះទេ។
ខ្ញុំនិយាយថា ប្រហែលជាយើងមិនចាំបាច់ត្រូវការកងទ័ពថ្មើរជើង ឬក៏យើងនឹងត្រូវការ ប្រសិនបើចាំបាច់»។
រដ្ឋមន្ត្រីការពារជាតិអាមេរិក លោក Pete Hegseth បានឱ្យដឹងកាលពីព្រឹកថ្ងៃចន្ទនៅឯសន្និសីទសារព័ត៌មានមួយនៅមន្ទីរបញ្ចកោណថា មិនមានកងទ័ពអាមេរិក ណាម្នាក់កំពុងស្ថិតនៅក្នុងប្រទេសអ៊ីរ៉ង់នោះទេ។
ជាមួយគ្នានេះលោក ដូណាល់ ត្រាំ ប្រធានាធិបតី ក៏បានប្តេជ្ញាឆ្លើយតបឆាប់ៗ នេះ” ចំពោះការវាយប្រហារ ដែលបាន កំណត់ គោលដៅលើស្ថានទូត សហរដ្ឋអាមេរិក នៅទីក្រុងរីយ៉ាដ.។
ក្រសួងការពារជាតិអារ៉ាប៊ីសាអូឌីត បានឱ្យដឹងថា ដោយផ្អែកលើការវាយតម្លៃដំបូង ស្ថានទូតអាមេរិកប្រចាំទីក្រុងរីយ៉ាដ ត្រូវបានវាយប្រហារ ដោយយន្តហោះចំនួន២គ្រឿង ហើយបណ្តាលឱ្យមានអគ្គិភ័យបន្តិចបន្តួច និងខូចខាតយ៉ាងធ្ងន់ធ្ងរមួយចំនួន។
យោងតាមទីភ្នាក់ងារសារព័ត៌មាន បារាំង ស្ថានទូតអាមេរិកប្រចាំអារ៉ាប៊ីសាអូឌីត បានណែនាំឱ្យពលរដ្ឋស្នាក់នៅ ក្នុងផ្ទះរបស់ពួកគេ នៅទីក្រុងរីយ៉ាដ ចាដា និងដារ៉ាន និងការហោះហើរដែលមិនចាំបាច់នៅក្នុងតំបន់នេះ៕