ប្រធានាធិបតីអ៊ុយក្រែន លោកVolodymyr Zelenskyy បានប្រកាសថា អ្នកជំនាញយោធារបស់អ៊ុយក្រែន មួយក្រុមត្រូវបានបញ្ជូនទៅតំបន់មជ្ឈិមបូព៌ា ដើម្បីជួយការពារការវាយប្រហារដោយដ្រូនរបស់អ៊ីរ៉ង់។ ក្រុមអ្នកជំនាញនេះបានធ្វើដំណើរទៅកាន់ហ្ស៊កដានី ដើម្បីជួយការពារមូលដ្ឋានយោធារបស់សហរដ្ឋអាមេរិកនៅទីនោះ។
ប្រភពពីសារព័ត៌មានAnadolu Agencyនៅថ្ងៃទី១០ខែមីនា។
យោងតាមសារព័ត៌មានរដ្ឋអ៊ុយក្រែន ក្រុមអ្នកជំនាញបាននាំយកបច្ចេកវិទ្យាដ្រូនសម្រាប់ស្ទាក់ចាប់ជាមួយផងដែរ។ លោក Zelenskyy បាននិយាយថា សហរដ្ឋអាមេរិកបានស្នើសុំជំនួយពីអ៊ុយក្រែននៅថ្ងៃទី 5 ខែមីនា ហើយអ៊ុយក្រែនបានឆ្លើយតបភ្លាមៗ ដោយបញ្ជូនអ្នកជំនាញទៅជួយការពារ។
លោកក៏បានបញ្ជាក់ថា ប្រទេសជាច្រើននៅតំបន់ឈូងសមុទ្រ រួមមាន បារ៉ែន, អេមីរ៉ាតអារ៉ាប់រួម, គុយវ៉ែត, កាតា និង អារ៉ាប៊ីសាអូឌីត បានស្នើសុំជំនួយពីអ៊ុយក្រែន ដើម្បីពង្រឹងការការពារប្រឆាំងនឹងដ្រូនរបស់អ៊ីរ៉ង់៕