រដ្ឋមន្ត្រីទទួលបន្ទុកថាមពល និងវិទ្យាសាស្ត្រ និងបច្ចេកវិទ្យា Tan See Leng បានអះអាងថា ប្រទេសសិង្ហបុរីមានស្តុកថាមពលគ្រប់គ្រាន់សម្រាប់ប្រើប្រាស់បានរយៈពេលជាច្រើនខែ ទោះបីជាជម្លោះនៅតំបន់មជ្ឈិមបូព៌ាកំពុងប៉ះពាល់ដល់ទីផ្សារថាមពលពិភពលោកក៏ដោយ។
ប្រភពពីសារព័ត៌មានCNA នៅថ្ងៃទី១២ខែមីនា។
លោកបានបញ្ជាក់ថា រដ្ឋាភិបាលសិង្ហបុរីបានបង្កើតយុទ្ធសាស្ត្រច្រើនដើម្បីធានាសន្តិសុខថាមពល បន្ទាប់ពីវិបត្តិថាមពលសកលឆ្នាំ២០២២។ វិធានការទាំងនេះរួមមានការធ្វើពិពិធកម្មប្រភពថាមពល ការបង្កើតក្រុមហ៊ុន Singapore GasCo ដើម្បីគ្រប់គ្រងការផ្គត់ផ្គង់ឧស្ម័ន និងការរក្សាទុកស្តុកប្រេងម៉ាស៊ូត និងឧស្ម័នធម្មជាតិរាវ (LNG)។
ទោះជាយ៉ាងណា លោក Tan មិនបានបង្ហាញចំនួនស្តុកពិតប្រាកដទេ ដោយសារហេតុផលសន្តិសុខជាតិ ប៉ុន្តែបានបញ្ជាក់ថាប្រទេសនេះស្ថិតនៅក្នុងស្ថានភាពស្ថិរភាពហើយអាចទប់ទល់នឹងការរំខាននៃការផ្គត់ផ្គង់ថាមពលបាន៕