យោធាអ៊ីស្រាអែល បាននិយាយនៅថ្ងៃទី២៦.០៣.២០២៦ថា លោក Behnam Rezaei ប្រធាននាយកដ្ឋានស៊ើបការណ៍សម្ងាត់កងទ័ពជើងទឹក IRGC ត្រូវបានសម្លាប់ រួមជាមួយមេបញ្ជាការកងទ័ពជើងទឹកអ៊ីរ៉ង់ លោក Alireza Tangsiri ក្នុងការវាយប្រហារមួយនៅ Bandar Abbas។
សារព័ត៌មាន Iran International។
យោធា បាននិយាយថា ខ្លួនបាន “លុបបំបាត់មេបញ្ជាការជាន់ខ្ពស់នៃកងទ័ពជើងទឹក IRGC” ដោយបន្ថែមថា ប្រតិបត្តិការនេះ ផ្តោតលើថ្នាក់ដឹកនាំដែលពាក់ព័ន្ធនឹងសកម្មភាពសមុទ្រ។
លោក Rezaei បានដឹកនាំកិច្ចខិតខំប្រឹងប្រែងស៊ើបការណ៍សម្ងាត់កងទ័ពជើងទឹក អស់រយៈពេលជាច្រើនឆ្នាំ ហើយទទួលខុសត្រូវចំពោះការប្រមូលព័ត៌មានស៊ើបការណ៍សម្ងាត់លើប្រទេសក្នុងតំបន់ និងការសម្របសម្រួលជាមួយស្ថាប័នស៊ើបការណ៍សម្ងាត់ផ្សេងទៀត។
រដ្ឋមន្ត្រីការពារជាតិអ៊ីស្រាអែល បានប្រកាសពីការស្លាប់របស់លោក Tangsiri ពីមុន ដោយពណ៌នាអំពីគាត់ថាជាឥស្សរជនសំខាន់ម្នាក់ក្នុងប្រតិបត្តិការសមុទ្រ។
នាយករដ្ឋមន្ត្រី Benjamin Netanyahu បាននិយាយកាលពីថ្ងៃព្រហស្បតិ៍ថា អ៊ីស្រាអែល បន្តវាយប្រហារគោលដៅនៅក្នុងប្រទេសអ៊ីរ៉ង់ ដោយកម្លាំងពេញលេញ” ដោយសំដៅទៅលើការសម្លាប់លោក Alireza Tangsiri មេបញ្ជាការកងទ័ពជើងទឹក នៃឆ្មាំបដិវត្តន៍អ៊ីស្លាមអ៊ីរ៉ង់របស់អ៊ីស្រាអែល។
នៅក្នុងសារវីដេអូខ្លីមួយ លោក Netanyahu បានពណ៌នាអំពីលោក Tangsiri ថាជាអ្នកទទួលខុសត្រូវចំពោះកិច្ចខិតខំប្រឹងប្រែងដើម្បីបិទច្រកសមុទ្រ Hormuz ហើយបានហៅការសម្លាប់នេះថាជាឧទាហរណ៍មួយទៀតនៃកិច្ចសហប្រតិបត្តិការរវាងអ៊ីស្រាអែល និងសហរដ្ឋអាមេរិកក្នុងការស្វែងរកគោលបំណងសង្គ្រាមរួមគ្នា។
«យើងកំពុងបន្តវាយប្រហារដោយកម្លាំងពេញលេញទៅលើគោលដៅនៃរបបភេរវកម្មអ៊ីរ៉ង់»នាយករដ្ឋមន្ត្រីអ៊ីស្រាអែលបានមានប្រសាសន៍។ «យប់មិញ យើងបានកម្ចាត់មេបញ្ជាការកងទ័ពជើងទឹកនៃកងឆ្មាំបដិវត្តន៍អ៊ីស្លាម។
បុគ្គលនេះមានឈាមច្រើននៅលើដៃរបស់គាត់ ហើយគាត់ក៏ទទួលខុសត្រូវក្នុងការដឹកនាំការបិទច្រកសមុទ្រហ័រមូសផងដែរ»៕