អ្នកនាំពាក្យគណៈកម្មាធិការសន្តិសុខជាតិរបស់សភាអ៊ីរ៉ង់ បាននិយាយថា ការវាយប្រហារណាមួយលើកោះ Kharg នឹងត្រូវទទួលការឆ្លើយតបយ៉ាងម៉ឺងម៉ាត់ ហើយគ្មានអ្នកវាយប្រហារណាម្នាក់ នឹងរស់រានមានជីវិតឡើយ។
សារព័ត៌មាន Iran International នៅថ្ងៃទី២៨.០៣.២០២៦។
លោក Ebrahim Rezaei បាននិយាយកាលពីថ្ងៃសៅរ៍ថា ប្រសិនបើមានការវាយប្រហារណាមួយ លើកោះ Kharg នៅអ៊ីរ៉ង់ នឹងឆ្លើយតបយ៉ាងម៉ឺងម៉ាត់បំផុត ហើយអ្នកដែលវាយប្រហារលើកោះនេះ នឹងមិនអាចរស់រានមានជីវិតឡើយ។
ប្រទេសបារ៉ែន និងអារ៉ាប់រួមអេមីរ៉ាតបានរងការវាយប្រហារ ដោយមីស៊ីល និងយន្តហោះគ្មានមនុស្សបើក របស់អ៊ីរ៉ង់ នៅព្រឹកថ្ងៃសៅរ៍។
ក្រសួងមហាផ្ទៃបារ៉ែន បាននិយាយថា ស៊ីរ៉ែនវាយប្រហារ តាមអាកាសត្រូវបានធ្វើឱ្យសកម្មនៅទូទាំងប្រទេស ហើយអគ្គីភ័យនៅកន្លែងមួយបន្ទាប់ពីការវាយប្រហារត្រូវបានគ្រប់គ្រងរួចរាល់ហើយ។
ក្រសួងការពារជាតិអារ៉ាប់រួម បាននិយាយថា ប្រព័ន្ធការពារដែនអាកាសរបស់ខ្លួនកំពុងស្ទាក់ចាប់ និងឆ្លើយតបទៅនឹងមីស៊ីល និងយន្តហោះគ្មានមនុស្សបើកដែលបាញ់ចេញពីអ៊ីរ៉ង់។
មនុស្សប្រាំនាក់ បានរងរបួសនៅទីក្រុង Abu Dhabi បន្ទាប់ពីកម្ទេចកម្ទីពីមីស៊ីលអ៊ីរ៉ង់ដែលត្រូវបានស្ទាក់ចាប់បានធ្លាក់នៅជិតតំបន់សេដ្ឋកិច្ច Khalifa នេះបើយោងតាមការចុះផ្សាយរបស់ Reuters។
អាជ្ញាធរមុននេះ បាននិយាយថា អគ្គីភ័យពីរបានផ្ទុះឡើងនៅព្រឹកថ្ងៃសៅរ៍ នៅក្នុងតំបន់ដដែលបន្ទាប់ពីការធ្លាក់កម្ទេចកម្ទីមីស៊ីល ដោយបន្ថែមថា ក្រុមសង្គ្រោះបន្ទាន់កំពុងធ្វើការដើម្បីទប់ស្កាត់អណ្តាតភ្លើង៕