អ៊ីរ៉ង់ បានធ្វើការវាយប្រហារដោយមីស៊ីល និងយន្តហោះគ្មានមនុស្សបើកយ៉ាងហោចណាស់៥.៤៧១លើក ដោយកំណត់គោលដៅមូលដ្ឋានទ័ពអាមេរិក និងទីតាំងសំខាន់ៗ នៅក្នុងប្រទេសអារ៉ាប់ ចំនួន៧ចាប់តាំងពីថ្ងៃទី ២៨ ខែកុម្ភៈ នេះបើយោងតាមទិន្នន័យផ្លូវការដែលបានចងក្រងនៅព្រឹកថ្ងៃចន្ទ។
សារព័ត៌មានAnadolu នៅថ្ងៃទី៣០.០៣.២០២៦។
ខណៈពេលដែលការវាយប្រហារ រវាងសហរដ្ឋអាមេរិក និងអ៊ីស្រាអែល លើអ៊ីរ៉ង់ និងការសងសឹក របស់ទីក្រុងតេអេរ៉ង់ នៅតែបន្ត ទីតាំងសំខាន់ៗជាច្រើននៅទូទាំងប្រទេសឈូងសមុទ្រ ត្រូវបានកំណត់គោលដៅ។
យោងតាមព័ត៌មាន ដែលចងក្រងពីក្រសួងការពារជាតិ និងមជ្ឈមណ្ឌលព័ត៌មានផ្លូវការ ឃើញថា ប្រទេសដែលរងផលប៉ះពាល់ខ្លាំងជាងគេ គឺអារ៉ាប់រួម.!។
ក្រសួងការពារជាតិអារ៉ាប់រួម បាននិយាយថា ប្រព័ន្ធការពារដែនអាកាសរបស់ខ្លួន បានស្ទាក់ចាប់មីស៊ីលផ្លោងចំនួន៤១៤គ្រាប់ មីស៊ីលបញ្ជាចំនួន១៥គ្រាប់ និងយន្តហោះគ្មានមនុស្សបើកចំនួន១.៩១៤គ្រឿង ចាប់តាំងពីការ ចាប់ផ្តើមនៃការវាយប្រហារ។
គុយវ៉ែត បាននិយាយថា ខ្លួនបានស្ទាក់ចាប់មីស៊ីលផ្លោងចំនួន៣០៩ គ្រាប់ និងយន្តហោះគ្មានមនុស្សបើកចំនួន ៦១៦ គ្រឿង នេះបើយោងតាមសេចក្តីថ្លែងការណ៍ពីមជ្ឈមណ្ឌលព័ត៌មានរបស់រដ្ឋាភិបាល និងយោធា។
បញ្ជាការទូទៅនៃកងកម្លាំងការពារជាតិបារ៉ែន បាននិយាយថា មីស៊ីលចំនួន ១៧៤គ្រាប់ និងយន្តហោះគ្មានមនុស្សបើកចំនួន ៣៩១គ្រឿងត្រូវបានបន្សាបក្នុងរយៈពេលដូចគ្នា។
ក្រសួងការពារជាតិកាតាបានរាយការណ៍ពីការវាយប្រហារដោយមីស៊ីលបាលីស្ទិកចំនួន ២០៦ គ្រាប់ និងការវាយប្រហារដោយយន្តហោះគ្មានមនុស្សបើកចំនួន ៩៣ គ្រាប់ ដែលកំណត់គោលដៅប្រទេសនេះ។
យោធាហ្ស៊កដានី បាននិយាយថា ការវាយប្រហារដោយមីស៊ីល និងយន្តហោះគ្មានមនុស្សបើកចំនួន២៦២ គ្រាប់ត្រូវបានកត់ត្រាទុក ក្នុងអំឡុងពេលជម្លោះ។
អារ៉ាប៊ីសាអូឌីត បាននិយាយថា យ៉ាងហោចណាស់មីស៊ីលចំនួន ៥២ គ្រាប់ និងយន្តហោះគ្មានមនុស្សបើកចំនួន១.០០៦ គ្រាប់បានកំណត់គោលដៅទឹកដីរបស់ខ្លួន។
អូម៉ង់ បាននិយាយថា ខ្លួនត្រូវបានវាយប្រហារដោយយន្តហោះគ្មានមនុស្សបើកចំនួន ១៩គ្រឿង។
ការកើនឡើងនៃភាពតានតឹងក្នុងតំបន់បានបន្តកើនឡើងចាប់តាំងពីអ៊ីស្រាអែល និងសហរដ្ឋអាមេរិកបានចាប់ផ្តើមការវាយលុកប្រឆាំងនឹងអ៊ីរ៉ង់នៅថ្ងៃទី ២៨ ខែកុម្ភៈ ដោយបានសម្លាប់មនុស្សជាង ១.៥៤០ នាក់រហូតមកដល់បច្ចុប្បន្ន រួមទាំងមេដឹកនាំកំពូល Ayatollah Ali Khamenei ផងដែរ៕