កាលពីថ្ងៃសៅរ៍ ប្រជាពលរដ្ឋជាច្រើន បានរាយការណ៍ថាមានការផ្ទុះជាច្រើនកើតឡើងនៅតំបន់ផ្សេងៗនៃទីក្រុងតេអេរ៉ង់និងតំបន់ជុំវិញ បង្កឱ្យមានការភ័យខ្លាចដល់ប្រជាជន។
ប្រភពពីសារព័ត៌មានIran International នៅថ្ងៃទី៤ ខែមេសា។
តាមសាក្សីនៅតំបន់ភាគខាងលិចដូចជា Jannat Abad, Punak, Shahran, Shahrak-e Azadi និង Ekbatan បាននិយាយថា ពួកគេបានឮសំឡេងផ្ទុះខ្លាំងមួយឬពីរ នៅម៉ោងប្រហែល០២:២៤ ដល់ ០២:២៦ ព្រឹក ដោយផ្ទះខ្លះមានអារម្មណ៍ញ័រផងដែរ។
នៅភាគខាងត្បូងនៃទីក្រុង រួមមាន Mehrabad, Eslamshahr និង Shahr-e Rey ក៏មានការរាយការណ៍ពីសំឡេងផ្ទុះដូចគ្នា ខណៈប្រជាពលរដ្ឋមួយចំនួនបានជួបប្រទះការដាច់ភ្លើង។
ជាមួយគ្នានេះ ប្រជាជននៅក្នុងខេត្ត Alborz Province ជិតខាង ដូចជា Karaj និងតំបន់ជុំវិញ បាននិយាយថា ពួកគេបានឮសំឡេងផ្ទុះ ក៏ដូចជាសំឡេងយន្តហោះចម្បាំង។
មកទល់ពេលនេះ មូលហេតុច្បាស់លាស់នៃការផ្ទុះទាំងនេះមិនទាន់ត្រូវបានអាជ្ញាធរបញ្ជាក់ជាផ្លូវការនៅឡើយទេ៕