កាសែត Financial Times បានរាយការណ៍នៅថ្ងៃពុធទី១៥.០៤.២០២៦ថា អ៊ីរ៉ង់ បានទិញផ្កាយរណបចារកម្មចិន ដោយសម្ងាត់ ដែលផ្តល់ឱ្យវានូវសមត្ថភាពថ្មី ក្នុងការតាមដានមូលដ្ឋានយោធាអាមេរិក នៅទូទាំងមជ្ឈិមបូព៌ា ក្នុងអំឡុងពេលសង្គ្រាមថ្មីៗនេះ ដោយដកស្រង់ឯកសារយោធាអ៊ីរ៉ង់ ដែលលេចធ្លាយ។
សារព័ត៌មាន Iran International នៅថ្ងៃទី១៥.០៤.២០២៦។
ទីតាំងដែលត្រូវបានត្រួតពិនិត្យ គឺនៅក្នុងប្រទេសអារ៉ាប៊ីសាអូឌីត ហ្ស៊កដានី បារ៉ែន អ៊ីរ៉ាក់ គុយវ៉ែត ជីប៊ូទី អូម៉ង់ និងអារ៉ាប់រួម ហើយរួមមានមូលដ្ឋានយោធាអាមេរិក ក៏ដូចជាហេដ្ឋារចនាសម្ព័ន្ធមួយចំនួនផងដែរ នេះបើយោងតាមរបាយការណ៍។
ផ្កាយរណបនេះ ដែលត្រូវបានគេស្គាល់ថា TEE-01B ត្រូវបានទិញដោយកងកម្លាំងអវកាសនៃឆ្មាំបដិវត្តន៍អ៊ីស្លាមនៅចុងឆ្នាំ2024 បន្ទាប់ពីវាត្រូវបានបាញ់បង្ហោះ ពីប្រទេសចិន។
លោកស្រី Nicole Grajewski អ្នកជំនាញខាងអ៊ីរ៉ង់ នៅសាកលវិទ្យាល័យ Sciences Po បានប្រាប់កាសែត Financial Times ថា “ផ្កាយរណបនេះច្បាស់ជាត្រូវបានប្រើប្រាស់សម្រាប់គោលបំណងយោធា ព្រោះវាត្រូវបានដំណើរការដោយកងកម្លាំងអវកាសរបស់ IRGC មិនមែនកម្មវិធីអវកាសស៊ីវិល របស់អ៊ីរ៉ង់ទេ”។
បញ្ជីកូអរដោនេ ដែលបានបោះត្រាពេលវេលា រូបភាពផ្កាយរណប និងការវិភាគគន្លងបានបង្ហាញថា មេបញ្ជាការអ៊ីរ៉ង់ បានប្រើប្រាស់ផ្កាយរណបនេះ ដើម្បីតាមដានទីតាំងយោធាសំខាន់ៗរបស់សហរដ្ឋអាមេរិក។
រូបភាពទាំងនោះ ត្រូវបានថតនៅក្នុងខែមីនាមុន និងក្រោយការវាយប្រហារដោយយន្តហោះគ្មានមនុស្សបើក និងមីស៊ីលលើទីតាំងទាំងនោះ។
លោក Grajewski បានបន្ថែមថា “អ៊ីរ៉ង់ពិតជាត្រូវការសមត្ថភាពដែលផ្តល់ដោយបរទេសនេះក្នុងអំឡុងពេលសង្គ្រាមនេះ ព្រោះវាអនុញ្ញាតឱ្យ IRGC កំណត់គោលដៅជាមុន និងពិនិត្យមើលភាពជោគជ័យនៃការវាយប្រហាររបស់ខ្លួន”៕