(ភ្នំពេញ)៖ ក្រសួងព្រះបរមរាជវាំង នៅថ្ងៃទី១៨ ខែមេសា ឆ្នាំ២០២៦ បានចេញសេចក្តីប្រកាសព័ត៌មានស្តីពីស្ថានភាពព្រះរាជសុខភាពរបស់ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា។
ខណៈដែលព្រះអង្គ កំពុងទទួលការពិនិត្យព្រះរាជសុខភាព នៅរដ្ឋធានីប៉េកាំង ប្រទេសចិន។
ក្រុមគ្រូពេទ្យជំនាញ នៃមន្ទីរពេទ្យរដ្ឋធានីប៉េកាំង បានយកចិត្តទុកដាក់ខ្ពស់ក្នុងការពិនិត្យ និងវាយតម្លៃព្រះរាជសុខភាពរបស់ព្រះអង្គយ៉ាងម៉ត់ចត់បំផុត។
ក្រុមគ្រូពេទ្យបានថ្វាយយោបល់សុំឱ្យព្រះអង្គទទួលការព្យាបាលដោយវះកាត់។
ព្រះករុណាជាអម្ចាស់ជីវិតលើត្បូង បានសព្វព្រះរាជហឫទ័យទទួលការព្យាបាលដោយវះកាត់ តាមវេជ្ជបញ្ជា នៅមន្ទីរពេទ្យរដ្ឋធានីប៉េកាំង ចាប់ពីថ្ងៃទី១៨ ខែមេសា ឆ្នាំ២០២៦។
ក្រោយពីការវះកាត់ បានជោគជ័យ ព្រះអង្គ នឹងបន្តគង់ប្រថាប់មួយរយៈដដែល នៅទីក្រុងប៉េកាំង ដើម្បីឱ្យក្រុមគ្រូពេទ្យតាមដាន និងថែទាំព្រះរាជសុខភាព។
សេចក្តីប្រកាសបញ្ជាក់ថា ក្រោយពីទទួលបានការបញ្ជាក់ ពីក្រុមគ្រូពេទ្យថា ព្រះរាជសុខភាពបានធូរស្រាល និងមានព្រះកាយពលមាំមួនជាប្រក្រតីឡើងវិញហើយនោះ ព្រះករុណា ព្រះមហាក្សត្រ និង សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ នឹងយាងនិវត្តន៍មកកាន់មាតុប្រទេសវិញក្នុងពេលឆាប់ៗខាងមុខនេះ។
ក្រសួងព្រះបរមរាជវាំង បានជម្រាបជូនសាធារណជន និងប្រជានុរាស្ត្រទាំងអស់ឱ្យបានជ្រាបជាព័ត៌មាន និងបន្តថ្វាយព្រះពរដល់អង្គព្រះមហាក្សត្រ និងសម្តេចព្រះមហាក្សត្រី ឱ្យមានព្រះរាជសុខភាពល្អបរិបូរណ៍ និងព្រះជន្មាយុយឺនយូរ៕