ព្រះសង្ឃស្រីលង្កាចំនួន២៣អង្គ ត្រូវបានអាជ្ញាធរចាប់ខ្លួន បន្ទាប់ពីរកឃើញកញ្ឆាប្រមាណ១១០គីឡូក្រាម លាក់ក្នុងឥវ៉ាន់នៅអាកាសយានដ្ឋានក្នុងរដ្ឋធានីកូឡុំបូ។
ប្រភពពីសារព័ត៌មានBBC នៅថ្ងៃទី២៨ខែមេសា។
មន្ត្រីគយបានឲ្យដឹងថា ព្រះសង្ឃនីមួយៗមានថ្នាំប្រភេទ Kush ប្រហែល ៥ គីឡូក្រាម លាក់នៅក្នុងជញ្ជាំងក្លែងក្លាយនៃវ៉ាលី។ ពួកគេត្រូវបានឃុំខ្លួននៅថ្ងៃសៅរ៍ ខណៈវិលត្រឡប់ពីប្រទេសថៃ បន្ទាប់ពីដំណើរកម្សាន្តរយៈពេល ៤ ថ្ងៃ ដែលមានអ្នកឧបត្ថម្ភមិនបង្ហាញអត្តសញ្ញាណ។
ប៉ូលីសបានបន្តចាប់ខ្លួនព្រះសង្ឃអង្គទី ២៣ ដែលត្រូវសង្ស័យថាជាអ្នករៀបចំដំណើរកម្សាន្តនេះ នៅជាយក្រុងកូឡុំបូ។ អ្នកនាំពាក្យប៉ូលីសបញ្ជាក់ថា ព្រះសង្ឃអង្គនេះបានប្រាប់អ្នកដទៃថា កញ្ចប់ទាំងនោះគឺជា “អំណោយ” ហើយមានរថយន្តមកទទួល។
អាជ្ញាធរប្រឆាំងគ្រឿងញៀនក៏បានរកឃើញរូបភាព និងវីដេអូនៅលើទូរស័ព្ទ ដែលបង្ហាញព្រះសង្ឃខ្លះស្លៀកពាក់ធម្មតា និងរីករាយក្នុងដំណើរកម្សាន្ត។
ករណីនេះកំពុងស្ថិតក្រោមការស៊ើបអង្កេតបន្ត៕