ប៉ូលីសអ៊ីស្រាអែល បានចាប់ខ្លួនបុរសអាយុ36ឆ្នាំម្នាក់ ពាក់ព័ន្ធនឹងករណីប្រើអំពើហិង្សាលើដូនជីម្នាក់នៅភាគខាងកើតនៃទីក្រុង Jerusalem ដែលត្រូវបានកាន់កាប់។ អាជ្ញាធរបានបញ្ជាក់ថា ករណីនេះកំពុងត្រូវបានស៊ើបអង្កេតជាការវាយប្រហារដោយការរើសអើងជាតិសាសនា ហើយគ្រោងនឹងស្នើសុំតុលាការបន្តការឃុំខ្លួនជនសង្ស័យ។
ប្រភពពីសារព័ត៌មានAnadolu Agency នៅថ្ងៃទី៣០ខែមេសា។
យោងតាមសេចក្តីថ្លែងការណ៍របស់ប៉ូលីស ការវាយប្រហារនេះត្រូវបានរាយការណ៍កាលពីថ្ងៃអង្គារ មុនពេលកម្លាំងសន្តិសុខធ្វើការស្វែងរក និងចាប់ខ្លួនជនសង្ស័យ។
ហេតុការណ៍នេះកើតឡើងក្នុងបរិបទនៃការកើនឡើងនៃអំពើហិង្សាប្រឆាំងនឹងបុគ្គលសាសនា និងទីកន្លែងបូជានានា នៅភាគខាងកើតទីក្រុង។ មេដឹកនាំសាសនាគ្រិស្តបានអំពាវនាវឱ្យអាជ្ញាធរអ៊ីស្រាអែលចាត់វិធានការយ៉ាងតឹងរឹង ដើម្បីការពារសុវត្ថិភាពបព្វជិត និងដូនជី៕