នាវាមួយគ្រឿង ដែលត្រូវបានសហរដ្ឋអាមេរិកស្ទាក់ចាប់ ដោយសារព្យាយាមឆ្លងកាត់ផ្លូវកំពង់ផែអ៊ីរ៉ង់ ត្រូវបានផ្ទេរទៅប្រទេសប៉ាគីស្ថាន សម្រាប់ធ្វើមាតុភូមិនិវត្តន៍ ទៅប្រទេសអ៊ីរ៉ង់ រួមជាមួយក្រុមនាវិក២២នាក់។
សារព័ត៌មានAnadolu នៅថ្ងៃទី០៤.០៥.២០២៦។
ទូរទស្សន៍ ABC News បានដកស្រង់សម្តីអ្នកនាំពាក្យ CENTCOM លោកអនុសេនីយ៍ឯក Tim Hawkins ដែលបាននិយាយថា“ថ្ងៃនេះ កងកម្លាំងអាមេរិក បានបញ្ចប់ការផ្ទេរសមាជិកនាវិកចំនួន 22នាក់នៃនាវា M/V Touska ទៅកាន់ប្រទេសប៉ាគីស្ថានសម្រាប់ធ្វើមាតុភូមិនិវត្តន៍”។
លោក Hawkins បន្ថែមថា អ្នកដំណើរចំនួនប្រាំមួយនាក់ផ្សេងទៀត ត្រូវបានផ្ទេរទៅកាន់ប្រទេស ក្នុងតំបន់សម្រាប់ធ្វើមាតុភូមិនិវត្តន៍ កាលពីសប្តាហ៍មុន។
ប្រព័ន្ធផ្សព្វផ្សាយរដ្ឋអ៊ីរ៉ង់ បានរាយការណ៍ថា បុគ្គលទាំងប្រាំមួយនាក់គឺជាសមាជិកគ្រួសារ របស់ក្រុមនាវិកមួយចំនួន។
CENTCOM មិនបានឆ្លើយតបទៅនឹងសំណើសុំការបញ្ជាក់ទេ អាជ្ញាធរប៉ាគីស្ថាន និងអ៊ីរ៉ង់ ក៏មិនទាន់បានបញ្ជាក់ពីរបាយការណ៍នេះដែរ។
កងកម្លាំងកងទ័ពជើងទឹកអាមេរិក បានរឹបអូសនាវា Touska នៅថ្ងៃទី 19 ខែមេសា នៅក្នុងឈូងសមុទ្រអូម៉ង់ បន្ទាប់ពីវាត្រូវបានគេរាយការណ៍ថា បដិសេធមិនគោរពតាមការណែនាំបិទផ្លូវ៕