ឆ្មាំសមុទ្រសហរដ្ឋអាមេរិក បានរឹបអូសកូកាអ៊ីនជាង ២,៧៦០ គីឡូក្រាម នៅសមុទ្រការ៉ាប៊ីនក្បែរ ប្រទេសកូឡុំប៊ី ដែលមានតម្លៃប្រហែល៤៥,៨លានដុល្លារ។
ប្រភពពីសារព័ត៌មានAnadolu Agency នៅថ្ងៃទី១៥ខែឧសភា។
ប្រតិបត្តិការនេះធ្វើឡើងកាលពីថ្ងៃទី ៨ ឧសភា ក្បែរទីក្រុង Cartagena ដោយឆ្មាំសមុទ្រអាមេរិកបានបញ្ឈប់ទូកសង្ស័យរត់ពន្ធគ្រឿងញៀន៣គ្រឿងក្នុងពេលតែមួយ។
មន្ត្រីអាមេរិកនិយាយថា គ្រឿងញៀនដែលរឹបអូសបាននេះ ស្មើនឹងកូកាអ៊ីនប្រហែល ២,៣ លានដូស ដែលអាចបង្កគ្រោះថ្នាក់ដល់ប្រជាជនអាមេរិក។
សូមបញ្ជាក់ថា៖ ក្នុងប្រតិបត្តិការ មានទូកមួយព្យាយាមរត់គេច ប៉ុន្តែត្រូវកងកម្លាំងអាមេរិកបាញ់បំផ្លាញម៉ាស៊ីនទូក ដើម្បីបញ្ឈប់វា។
យោធាអាមេរិកបាននិយាយថា ប្រតិបត្តិការនេះជាផ្នែកនៃការបង្ក្រាបបណ្តាញរត់ពន្ធគ្រឿងញៀននៅតំបន់អាមេរិកឡាទីន៕