មន្ត្រីជាន់ខ្ពស់នៃក្រុមហាម៉ាសម្នាក់ បានប្រាប់(រ៉យទ័រ)នៅថ្ងៃសៅរ៍ទី១៦.០៥.២០២៦ថា ប្រធានយោធារបស់ក្រុមនេះ ត្រូវបានសម្លាប់ដោយសារការវាយប្រហារ តាមអាកាសរបស់អ៊ីស្រាអែល ដែលផ្តោតលើទីក្រុងហ្គាហ្សា.!។
សាក្សីនៅក្នុងទីក្រុងហ្គាហ្សាបាននិយាយថា វិហារអ៊ីស្លាមបានប្រកាសពី “ការធ្វើទុក្ករកម្ម”របស់ Izz al-Din al-Haddad។
គាត់គឺជាមន្ត្រីជាន់ខ្ពស់បំផុត របស់ហាម៉ាស ដែលត្រូវបានសម្លាប់ដោយអ៊ីស្រាអែលចាប់តាំងពីកិច្ចព្រមព្រៀងឈប់បាញ់ដែលគាំទ្រ ដោយសហរដ្ឋអាមេរិក កាលពីខែតុលា ដែលមានបំណងបញ្ឈប់ការប្រយុទ្ធគ្នានៅហ្គាហ្សា។
ក្រុមតស៊ូប៉ាឡេស្ទីនហាម៉ាស មិនទាន់បានបញ្ជាក់ជាសាធារណៈអំពីការស្លាប់របស់ហាដាដនៅឡើយទេ។
នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយនៅក្នុងសេចក្តីថ្លែងការណ៍រួមគ្នា ជាមួយរដ្ឋមន្ត្រីការពារជាតិរបស់គាត់កាលពីថ្ងៃសុក្រថា ហាដាដត្រូវបានគេកំណត់គោលដៅ ទោះបីជាពួកគេមិនបាននិយាយថា គាត់ត្រូវបានសម្លាប់ឬអត់ក៏ដោយ។
លោក Netanyahu និងរដ្ឋមន្ត្រីការពារជាតិអ៊ីស្រាអែល Katz បាននិយាយថា ហាដាដគឺជាស្ថាបត្យករនៃការវាយប្រហារនៅថ្ងៃទី៧ ខែតុលា ឆ្នាំ 2023 ដែលបានចាប់ផ្តើមដោយហាម៉ាស ដែលបានបង្កឱ្យមានការវាយប្រហារជាបន្តបន្ទាប់របស់អ៊ីស្រាអែលលើហ្គាហ្សា។
លោក Haddad ដែលបានក្លាយជាប្រធានយោធារបស់ក្រុមនេះនៅក្នុងតំបន់ហ្គាហ្សា បន្ទាប់ពីការសម្លាប់លោក Mohammad Sinwar ដោយអ៊ីស្រាអែលក្នុងខែឧសភា ឆ្នាំ២០២៥ «ទទួលខុសត្រូវចំពោះឃាតកម្ម ការចាប់ពង្រត់ និងគ្រោះថ្នាក់ដែលបង្កឡើងលើជនស៊ីវិល (និង) ទាហានអ៊ីស្រាអែលរាប់ពាន់នាក់»ពួកគេបាននិយាយ។
អ៊ីស្រាអែល និងហាម៉ាស នៅតែជាប់គាំងក្នុងការចរចាដោយប្រយោល ដើម្បីជំរុញផែនការក្រោយសង្គ្រាមរបស់ប្រធានាធិបតីអាមេរិក លោក Donald Trump សម្រាប់តំបន់ហ្គាហ្សា ដែលមានបំណងបញ្ចប់ការប្រយុទ្ធគ្នាជាងពីរឆ្នាំ។
គ្រូពេទ្យនៅតំបន់ហ្គាហ្សាកាលពីថ្ងៃសុក្របាននិយាយថា យ៉ាងហោចណាស់មនុស្សប្រាំពីរនាក់ រួមទាំងស្ត្រីបីនាក់ និងកុមារម្នាក់ ត្រូវបានសម្លាប់ និងយ៉ាងហោចណាស់50 នាក់រងរបួសនៅក្នុងការវាយប្រហារតាមអាកាសដែលកំណត់គោលដៅអាផាតមិន និងយានយន្តមួយ។ វាមិនច្បាស់ទេថាតើលោក Haddad ជាម្នាក់ក្នុងចំណោមអ្នកស្លាប់នោះទេ។
អ៊ីស្រាអែលបានបង្កើនការវាយប្រហាររបស់ខ្លួននៅក្នុងតំបន់ហ្គាហ្សាក្នុងរយៈពេលប៉ុន្មានសប្តាហ៍ ចាប់តាំងពីការបញ្ឈប់ការទម្លាក់គ្រាប់បែករួមគ្នាជាមួយសហរដ្ឋអាមេរិកនៅក្នុងប្រទេសអ៊ីរ៉ង់។
ដោយបង្វែរការបាញ់ប្រហាររបស់ខ្លួនត្រឡប់ទៅលើទឹកដីប៉ាឡេស្ទីនដែលត្រូវបានបំផ្លាញ ជាកន្លែងដែលយោធានិយាយថា ពួកយុទ្ធជនហាម៉ាសកំពុងរឹតបន្តឹងការគ្រប់គ្រងរបស់ពួកគេ៕