នៅថ្ងៃទី១ ខែមិថុនាក្រសួងសុខាភិបាលប៉ាឡេស្ទីនបានឱ្យដឹងថា បុរសប៉ាឡេស្ទីនអាយុ២៦ឆ្នាំម្នាក់ ឈ្មោះImad Haroun Ishtayeh ត្រូវបានកងកម្លាំងអ៊ីស្រាអែលបាញ់សម្លាប់នៅតំបន់al-Ram ក្បែរក្រុងJerusalem។
ប្រភពពីសារព័ត៌មានAP។
តាមការបញ្ជាក់របស់អាជ្ញាធរអ៊ីស្រាអែល បុរសរូបនេះបានព្យាយាមឆ្លងចូលប្រទេសអ៊ីស្រាអែលដោយខុសច្បាប់តាមរបាំងសន្តិសុខដែលបំបែកតំបន់West Bank ពីក្រុងយេរូសាឡឹម។
សាច់ញាតិរបស់ជនរងគ្រោះបាននិយាយថា គាត់ធ្លាប់ប្រកបអាជីវកម្មសត្តឃាតសត្វបក្សីនៅភូមិ Salem ប៉ុន្តែដោយសារវិបត្តិសេដ្ឋកិច្ចក្នុងតំបន់ West Bank អាជីវកម្មរបស់គាត់បានធ្លាក់ចុះយ៉ាងខ្លាំង។ ដូច្នេះ គាត់បានព្យាយាមចូលទៅអ៊ីស្រាអែល ដើម្បីស្វែងរកការងារធ្វើ និងជួយផ្គត់ផ្គង់គ្រួសារ៕
