ម៉ាឡេស៊ី បានចេញសេចក្តីថ្លែងការណ៍ថ្កោលទោសយ៉ាងខ្លាំងចំពោះការលើកទង់ជាតិអ៊ីស្រាអែលនៅក្នុងបរិវេណវិហារអាល់អាកសា ក្នុងក្រុងយេរូសាឡឹមខាងកើត ដោយចាត់ទុកទង្វើនេះថាជាការញុះញង់ធ្ងន់ធ្ងរនិងជាការរំលោភលើភាពពិសិដ្ឋនៃទីកន្លែងសាសនាអ៊ីស្លាម។
ប្រភពពីសារព័ត៌មានTRT World នៅថ្ងៃទី២ខែមិថុនា។
ក្រសួងការបរទេសម៉ាឡេស៊ីបានអះអាងថា សកម្មភាពរបស់អ្នកតាំងលំនៅអ៊ីស្រាអែល ដែលបានចូលទៅក្នុងបរិវេណវិហារក្រោមការការពាររបស់ប៉ូលីស និងលើកទង់ជាតិអ៊ីស្រាអែល កាលពីថ្ងៃអាទិត្យ គឺជាការប្រមាថដល់ទីកន្លែងពិសិដ្ឋ និងមានគោលបំណងផ្លាស់ប្តូរស្ថានភាពប្រវត្តិសាស្ត្រ វប្បធម៌ និងសាសនារបស់វិហារអាល់អាកសា៕
