សហរដ្ឋអាមេរិក នៅថ្ងៃអង្គារទី០៩.០៦.២០២៦ (ម៉ោងនៅក្នុងតំបន់)បានចាប់ផ្តើមការវាយប្រហារប្រឆាំងនឹងអ៊ីរ៉ង់។
បន្ទាប់ពីប្រធានាធិបតី ដូណាល់ ត្រាំ បាននិយាយថា ទីក្រុងតេអេរ៉ង់ បានបាញ់ទម្លាក់ឧទ្ធម្ភាគចក្រ Apache របស់សហរដ្ឋអាមេរិក នៅក្នុងច្រកសមុទ្រ Hormuz ។
ដែលធ្វើឲ្យមានការសង្ស័យកាន់តែខ្លាំងឡើងលើកិច្ចព្រមព្រៀងសន្តិភាព ដែលអាចកើតមាន និងធ្វើឱ្យបទឈប់បាញ់ដ៏ផុយស្រួយកាន់តែតានតឹង។
សារព័ត៌មាន(រ៉យទ័រ)។
លោក Trump បានប្រាប់ABC News ថា”ខ្ញុំជឿថា ការឆ្លើយតបគួរតែខ្លាំង ខ្លាំង ហើយនោះជាអ្វីដែលការឆ្លើយតបនេះ”។
ប្រព័ន្ធផ្សព្វផ្សាយរដ្ឋអ៊ីរ៉ង់ បានរាយការណ៍ថា កោះQeshm នៅក្នុងច្រកសមុទ្រ Hormuz ត្រូវបានវាយប្រហារ ហើយការបាញ់ផ្លោងត្រូវបានបញ្ជាក់ នៅក្នុងទីក្រុងកំពង់ផែ Sirik នៅលើច្រកសមុទ្រ។
សំឡេងផ្ទុះត្រូវបានឮនៅក្នុងទីក្រុង Bandar Abbas ក្បែរនោះ ហើយក្រោយមកនៅក្នុងតំបន់ជុំវិញស្រុក Jask ជិតច្រកចូលច្រកសមុទ្រ ប្រព័ន្ធផ្សព្វផ្សាយអ៊ីរ៉ង់ បានរាយការណ៍ដោយដកស្រង់ប្រភពព័ត៌មានក្នុងស្រុក និងអ្នកស្រុក។
បន្ទាប់ពីការវាយប្រហារដំបូង រដ្ឋមន្ត្រីការបរទេសអ៊ីរ៉ង់ លោក Abbas Araqchi បានបង្ហោះនៅលើX ថា ប្រទេសនេះនឹង”មិនទុកការវាយប្រហារ ឬការគំរាមកំហែងណាមួយដែលមិនត្រូវបានឆ្លើយតបឡើយ”។
នៅក្នុងការបង្ហោះមុននេះ លោកមិនបាននិយាយដោយផ្ទាល់អំពីឧប្បត្តិហេតុឧទ្ធម្ភាគចក្រនោះទេ។
ប៉ុន្តែបាននិយាយថា កងកម្លាំងបរទេសនៅក្នុងតំបន់ប្រឈមនឹងគ្រោះថ្នាក់ ឬការបាញ់ប្រហារគ្នាទៅវិញទៅមក។
លោកបានសរសេរថា”ដើម្បីកាត់បន្ថយហានិភ័យ ដំណោះស្រាយដ៏ល្អបំផុតគឺពួកគេត្រូវចាកចេញ”។
យោងតាមលោក Trump អ្នកបើកយន្តហោះអាមេរិក២នាក់ ដែលពាក់ព័ន្ធនឹងឧប្បត្តិហេតុឧទ្ធម្ភាគចក្រមិនមានរបួសទេ។
យោងតាមមន្ត្រីអាមេរិកម្នាក់ ដែលបាននិយាយក្នុងលក្ខខណ្ឌអនាមិក ឧទ្ធម្ភាគចក្រ Apache ត្រូវបានបាញ់ទម្លាក់ដោយយន្តហោះគ្មានមនុស្សបើកវាយប្រហាររបស់អ៊ីរ៉ង់ មួយគ្រឿង។
ប្រព័ន្ធផ្សព្វផ្សាយរដ្ឋអ៊ីរ៉ង់ បានដកស្រង់ប្រភពយោធាមួយថា មិនមានប្រតិបត្តិការយោធាវាយប្រហារណាមួយត្រូវបានធ្វើឡើងនៅក្នុងច្រកសមុទ្រ Hormuz ក្នុងរយៈពេល 24 ម៉ោងមុននោះទេ។
ប្រភពនេះក៏ត្រូវបានដកស្រង់សម្តីផងដែរថា នឹងមានការឆ្លើយតបយ៉ាងម៉ឺងម៉ាត់ក្នុងករណីមាន”អរិភាពឡើងវិញដោយសត្រូវ” ដើម្បីឆ្លើយតបទៅនឹងឧប្បត្តិហេតុឧទ្ធម្ភាគចក្រ។
ការវាយប្រហារចុងក្រោយបំផុត របស់សហរដ្ឋអាមេរិក បានចាប់ផ្តើមនៅម៉ោង 5ល្ងាច។
ET (ម៉ោង 2100 GMT) ហើយ «បេសកកម្មនេះ គឺជាការឆ្លើយតបសមាមាត្រទៅនឹងការឈ្លានពានរបស់អ៊ីរ៉ង់ដោយមិនសមហេតុផល»យោធាអាមេរិកបាននិយាយនៅលើ X។
ប្រព័ន្ធការពារដែនអាកាស និងប្រព័ន្ធរ៉ាដារបស់អ៊ីរ៉ង់ជាច្រើននៅជុំវិញច្រកសមុទ្រ Hormuz ត្រូវបានកំណត់គោលដៅ នេះបើយោងតាមការចុះផ្សាយរបស់ Axios ដោយដកស្រង់សម្តីមន្ត្រីអាមេរិកម្នាក់។
មិនមែនជារឿងធំដុំទេឬ?
លោក Trump បានប្រាប់ The Wall Street Journal ក្នុងអំឡុងពេលហៅទូរស័ព្ទកាលពីថ្ងៃអង្គារថា ឧប្បត្តិហេតុឧទ្ធម្ភាគចក្រ«មិនមែនជារឿងធំដុំទេ» ហើយបានសង្កត់ធ្ងន់ថា «អ្នកបើកយន្តហោះគឺល្អ»។
នៅភាគខាងជើងអ៊ីស្រាអែល កាលពីថ្ងៃអង្គារ កងទ័ពអ៊ីស្រាអែលដែលកំពុងប្រតិបត្តិការនៅក្នុងតំបន់ Ramim Ridge ជិតព្រំដែនលីបង់បានសម្លាប់មនុស្សម្នាក់នៅក្នុងឧប្បត្តិហេតុមួយដែលពួកគេបាញ់តបវិញ នេះបើយោងតាមយោធា។
អ៊ីស្រាអែល មិនដែលបញ្ឈប់យុទ្ធនាការលីបង់របស់ខ្លួនទេ ដែលបានសម្លាប់មនុស្សរាប់ពាន់នាក់ ដោយនិយាយថាជម្លោះគួរតែត្រូវបានចាត់ទុកដាច់ដោយឡែកពីបទឈប់បាញ់ណាមួយរវាងសហរដ្ឋអាមេរិក-អ៊ីរ៉ង់។
ក្រុមហេសបូឡា ក៏បានបន្តការវាយប្រហាររបស់ខ្លួនផងដែរ។
ក្នុងពេលជាមួយគ្នានេះ ទីក្រុងតេអេរ៉ង់បានបន្តរារាំងការដឹកជញ្ជូនភាគច្រើនឆ្លងកាត់ច្រកសមុទ្រ Hormuz ដែលមុនសង្គ្រាមបានដឹកជញ្ជូនប្រេងឆៅមួយភាគប្រាំនៃពិភពលោក និងឧស្ម័នធម្មជាតិរាវ។
ទីក្រុងវ៉ាស៊ីនតោន បានដាក់ការបិទច្រកកំពង់ផែអ៊ីរ៉ង់ដោយខ្លួនឯង។
លោក Chris Wright រដ្ឋមន្ត្រីក្រសួងថាមពលសហរដ្ឋអាមេរិក បាននិយាយកាលពីថ្ងៃអង្គារថា ចរាចរណ៍កប៉ាល់ឆ្លងកាត់ច្រកសមុទ្រ Hormuz កំពុងកើនឡើង “យ៉ាងខ្លាំង” ប៉ុន្តែបានបន្ថែមថា វានឹងចំណាយពេលច្រើនខែ ដើម្បីត្រលប់ទៅរកលំហូរថាមពលធម្មតាវិញ នៅពេលដែលសង្គ្រាមបានបញ្ចប់។
លោក Trump បាននិយាយថា កិច្ចព្រមព្រៀងសន្តិភាពណាមួយត្រូវតែធានាថា អ៊ីរ៉ង់មិនអាចអភិវឌ្ឍអាវុធនុយក្លេអ៊ែរបានទេ។
ការទាមទាររបស់អ៊ីរ៉ង់ រួមមានការលើកទណ្ឌកម្មអន្តរជាតិ ការដោះលែងទ្រព្យសម្បត្តិរាប់ពាន់លានដុល្លារដែលបង្កក និងការទទួលស្គាល់ការគ្រប់គ្រងរបស់ខ្លួនលើច្រកសមុទ្រ៕
