កងទ័ពអ៊ីស្រាអែល បាននិយាយនៅព្រឹកថ្ងៃព្រហស្បតិ៍ទី១១.០៦.២០២៦ថា រ៉ុក្កែតដែលបាញ់ចេញពីប្រទេសលីបង់ បានវាយប្រហារនៅជិតកងកម្លាំងរបស់ខ្លួនដែលកំពុងប្រតិបត្តិការ នៅភាគខាងត្បូងប្រទេសលីបង់ ខណៈដែលសំឡេងស៊ីរ៉ែនព្រមាន បានបន្លឺឡើងនៅភាគខាងជើងប្រទេសអ៊ីស្រាអែល។
សារព័ត៌មានTRT។
នៅក្នុងសេចក្តីថ្លែងការណ៍មួយ កងទ័ពបាននិយាយថា រ៉ុក្កែតពីរគ្រាប់ បានធ្លាក់នៅជិតកងកម្លាំងរបស់ខ្លួន ដោយមិនមានការរាយការណ៍ភ្លាមៗ អំពីអ្នកស្លាប់ ឬការខូចខាតនោះទេ។
កងទ័ព ក៏បាននិយាយផងដែរថា ការបាញ់បង្ហោះត្រូវ បានរកឃើញពីប្រទេសលីបង់ឆ្ពោះទៅកាន់អ្វីដែលខ្លួនពិពណ៌នាថាជាតំបន់លំនៅដ្ឋានជាច្រើននៅភាគខាងជើងប្រទេសអ៊ីស្រាអែល។
ទន្ទឹមនឹងនេះ បញ្ជាការដ្ឋានរណសិរ្សមាតុភូមិរបស់អ៊ីស្រាអែល បាននិយាយថា សំឡេងស៊ីរ៉ែនព្រមានបានបន្លឺឡើងនៅ Misgav Am និង Metula ក្នុងតំបន់ Upper Galilee។
ចាប់តាំងពីថ្ងៃទី2 ខែមីនា មក អ៊ីស្រាអែល បានធ្វើការវាយលុកនៅក្នុងប្រទេសលីបង់ ដែលបានសម្លាប់មនុស្សជិត 3,700 នាក់ និងរបួសជាង 11,400 នាក់ផ្សេងទៀតគិតត្រឹមថ្ងៃអង្គារ នេះបើយោងតាមតួលេខផ្លូវការរបស់លីបង់។
អ៊ីស្រាអែល ក៏បានចាប់ផ្តើមការឈ្លានពានលើដីគោក ដោយកាន់កាប់ទឹកដីលីបង់ប្រហែល2,000 គីឡូម៉ែត្រការ៉េ។
កាលពីសប្តាហ៍មុន អ៊ីស្រាអែល និងរដ្ឋាភិបាលលីបង់បានយល់ព្រមពង្រីកបទឈប់បាញ់ដែលសម្របសម្រួលដោយសហរដ្ឋអាមេរិក ដែលបានចាប់ផ្តើមនៅថ្ងៃទី17 ខែមេសា ដោយអាស្រ័យលើក្រុមហេសបូឡាបញ្ឈប់ការវាយប្រហាររបស់ខ្លួន និងជម្លៀសចេញពីតំបន់មួយនៅភាគខាងត្បូងប្រទេសលីបង់។
ប្រទេសលីបង់ និងអ៊ីស្រាអែល បានព្រមព្រៀងគ្នាបង្កើត«តំបន់សាកល្បង»ដែលកងទ័ពលីបង់នឹងគ្រប់គ្រងផ្តាច់មុខលើ«ការដកចេញនូវតួអង្គមិនមែនរដ្ឋទាំងអស់»។
អ៊ីស្រាអែល បានបន្តការវាយប្រហាររបស់ខ្លួន ទោះបីជាមានបទឈប់បាញ់ក៏ដោយ៕
