ប្រទេសកាតា នៅព្រឹកថ្ងៃចន្ទទី១៥.០៦.២០២៦ បានប្រកាសស្វាគមន៍ ចំពោះកិច្ចព្រមព្រៀងរវាងសហរដ្ឋអាមេរិកនិងអ៊ីរ៉ង់។
ដោយកាតា បង្ហាញការគាំទ្រចំពោះការចរចានាពេលខាងមុខ រវាងភាគីទាំងពីរ។
សារព័ត៌មានAnadolu។
នាយករដ្ឋមន្ត្រី និងជារដ្ឋមន្ត្រីការបរទេសកាតា លោក Sheikh Mohammed bin Abdulrahman bin Jassim Al Thani បានថ្លែងអំណរគុណដល់ប្រទេសប៉ាគីស្ថាន និងភាគីក្នុងតំបន់ និងអន្តរជាតិទាំងអស់ដែលបានជួយបង្កើត លក្ខខណ្ឌដែលនាំឱ្យមានកិច្ចព្រមព្រៀង។
លោក Sheikh Mohammed បាននិយាយនៅក្នុងសេចក្តីថ្លែងការណ៍មួយដែលបានបង្ហោះនៅលើវេទិកាប្រព័ន្ធផ្សព្វផ្សាយសង្គមXថា“យើងទន្ទឹងរង់ចាំគ្រប់ភាគីទាំងអស់ ចូលរួមក្នុងការចរចានាពេលខាងមុខក្នុងស្មារតីវិជ្ជមាន និងស្ថាបនា ដែលនឹងជួយពង្រឹងវឌ្ឍនភាពនេះ និងកសាងវា”។
លោកបញ្ជាក់ជាថ្មីថា កាតា នឹងនៅតែប្តេជ្ញាចិត្តគាំទ្រកិច្ចខិតខំប្រឹងប្រែងដែលមានគោលបំណងពង្រឹងសន្តិសុខ និងស្ថិរភាពក្នុងតំបន់ និងអន្តរជាតិតាមរយៈការសន្ទនា និងមធ្យោបាយសន្តិភាព។
មុននេះ ប្រធានាធិបតីអាមេរិក លោក Donald Trump បានបញ្ជាក់ថា កិច្ចព្រមព្រៀងជាមួយអ៊ីរ៉ង់ ត្រូវបានបញ្ចប់ និងបានប្រកាសពីការបើកច្រកសមុទ្រ Hormuz ឡើងវិញ រួមជាមួយនឹងការលើកលែងការបិទផ្លូវកងទ័ពជើងទឹករបស់សហរដ្ឋអាមេរិក។
លោក Trump បានសរសេរនៅលើវេទិកា Truth Social របស់លោកថា “កិច្ចព្រមព្រៀងជាមួយសាធារណរដ្ឋអ៊ីស្លាមអ៊ីរ៉ង់ឥឡូវនេះបានបញ្ចប់ហើយ”។
លោកបានបន្ថែមថា លោកបានអនុញ្ញាតឲ្យមាន«ការបើកច្រកសមុទ្រ Hormuz ដោយឥតគិតថ្លៃ»រួមជាមួយ«ការដកចេញភ្លាមៗ»នៃការបិទផ្លូវកងទ័ពជើងទឹករបស់អាមេរិកផងដែរ៕
