អគ្គលេខាធិការក្រុមHezbollah លោក Naim Qassem បានអះអាងថា អ៊ីស្រាអែលគ្មានជម្រើសអ្វីក្រៅពីដកកងទ័ពចេញពីទឹកដីលីបង់ទាំងស្រុង តាមកាលវិភាគដែលត្រូវបានកំណត់ក្រោយបទឈប់បាញ់។
ប្រភពពីសារព័ត៌មានAnadolu Agency នៅថ្ងៃទី២៤ខែមិថុនា។
ក្នុងសុន្ទរកថាតាមទូរទស្សន៍ លោក Qassem បាននិយាយថា បន្ទាប់ពីអ៊ីស្រាអែលដកទ័ពចេញ កងទ័ពលីបង់នឹងទទួលខុសត្រូវផ្តាច់មុខលើសន្តិសុខនៅតំបន់ភាគខាងត្បូងនៃទន្លេ Litani ហើយហេសបូឡាហ៍នឹងសហការជាមួយកងទ័ពលីបង់ក្នុងក្របខ័ណ្ឌសន្តិសុខជាតិ។
ការលើកឡើងនេះកើតឡើង ខណៈអ៊ីស្រាអែល និងលីបង់កំពុងបន្តកិច្ចចរចាដោយផ្ទាល់នៅទីក្រុង Washington ដើម្បីស្វែងរកដំណោះស្រាយបញ្ចប់ជម្លោះនៅភាគខាងត្បូងលីបង់។
ទោះជាយ៉ាងណា នាយករដ្ឋមន្ត្រីអ៊ីស្រាអែល Benjamin Netanyahu និងមន្ត្រីអ៊ីស្រាអែលផ្សេងៗ បានបញ្ជាក់ជាបន្តបន្ទាប់ថា កងទ័ពអ៊ីស្រាអែលនឹងមិនដកចេញពីតំបន់ដែលខ្លួនកំពុងកាន់កាប់នៅភាគខាងត្បូងលីបង់ឡើយ៕
