កាលពីថ្ងៃទី23 មិថុនា តម្លៃមាសពិភពលោកបានធ្លាក់ចុះជាង 1% ខណៈប្រាក់ដុល្លារអាមេរិកបានឡើងដល់កម្រិតខ្ពស់បំផុតក្នុងរយៈពេលជាងមួយឆ្នាំ។
ប្រភពពីសារព័ត៌មានReuter។
មូលហេតុសំខាន់គឺការរំពឹងថា Federal Reserve (Fed) អាចនឹងបន្តដំឡើងអត្រាការប្រាក់ ដើម្បីទប់ស្កាត់អតិផរណា។ អត្រាការប្រាក់ខ្ពស់ធ្វើឱ្យការវិនិយោគលើមាសមិនសូវទាក់ទាញ បើប្រៀបធៀបនឹងទ្រព្យសកម្មផ្សេងៗ។
មាស Spot បានធ្លាក់ចុះ 1.4% មកនៅត្រឹម 4,131 ដុល្លារក្នុងមួយអោន ខណៈកិច្ចសន្យាមាសអនាគតនៅសហរដ្ឋអាមេរិកបានធ្លាក់ចុះ 1.3% មកនៅ 4,149 ដុល្លារក្នុងមួយអោន។
អ្នកវិភាគទីផ្សារបានលើកឡើងថា វិនិយោគិនពេលនេះកំពុងផ្តោតខ្លាំងលើគោលនយោបាយរបស់ Fed ជាងស្ថានការណ៍នៅមជ្ឈិមបូព៌ា។ ការរំពឹងទុកនៃការដំឡើងអត្រាការប្រាក់បានជំរុញឱ្យប្រាក់ដុល្លារឡើងថ្លៃ ដែលជាហេតុធ្វើឱ្យតម្លៃមាសធ្លាក់ចុះ។
ជាមួយគ្នានេះ ទីផ្សារក៏កំពុងរង់ចាំទិន្នន័យសេដ្ឋកិច្ចសំខាន់ៗរបស់សហរដ្ឋអាមេរិក ដើម្បីវាយតម្លៃទិសដៅអត្រាការប្រាក់របស់ Fed ក្នុងរយៈពេលខាងមុខ៕
