(កណ្តាល)៖ ឯកឧត្តម ទូ សាខន ប្រធានក្រុមប្រឹក្សាខេត្តកណ្តាល រួមនិងឯកឧត្តម គួច ចំរើន អភិបាលខេត្តកណ្តាល កាលពីព្រឹកថ្ងៃទី២៤.០៦.២០២៦ បានអញ្ជើញជាអធិបតី ក្នុងពិធីសម្ពោធដាក់ឱ្យប្រើប្រាស់នូវសមិទ្ធផលនានា ក្នុងវិស័យអប់រំ នៅក្រុងសំពៅពូន ខេត្តកណ្តាល។
*ពិធីនេះធ្វើឡើង នៅបរិវេណ”វិទ្យាល័យសម្ដេចតេជោ ហ៊ុន សែន សំពៅពូន”ស្ថិតក្នុងភូមិព្រែកសែម សង្កាត់សំពៅពូន ក្រុងសំពៅពូន ខេត្តកណ្ដាល ដែលមានការចូលរួមពីមន្ត្រីពាក់ព័ន្ធជុំវិញសាលាខេត្ត.អាជ្ញាធរមូលដ្ឋាន និងប្រជាពលរដ្ឋយ៉ាងច្រើនកុះករ.!។
ក្នុងនោះលោក អេង សុវិចិត្រ អភិបាលក្រុងសំពៅពូន បានអានរបាយការណ៍ស្ដីពី ស្ថានភាពសណ្ដាប់ធ្នាប់សន្តិសុខ និងវិស័យអប់រំ.ជូនអង្គពិធី។
ក្នុងឱកាសនោះ ឯកឧត្តម គួច ចំរើន បានមានប្រសាសន៍ ណែនាំឱ្យយុវជននិងសិស្សានុសិស្សទាំងអស់ ត្រូវខិតខំរៀនសូត្រស្រូបយកចំណេះដឹង ដើម្បីឱ្យក្លាយជាទំពាំងស្នងឬស្សី សម្រាប់ប្រទេសជាតិរបស់យើង នាថ្ងៃអនាគត.។
ឯកឧត្តម បន្តថា សិស្សានុសិស្ស ត្រូវជៀសវាងឱ្យឆ្ងាយពីគ្រឿងញៀន និងកុំបណ្ដោយខ្លួនឱ្យក្លាយជាក្មេងទំនើងឱ្យសោះ ដែលសង្គមស្អប់ខ្ពើមនិងប្រឈមផ្លូវច្បាប់.!។
បន្ថែមពីនេះ ឯកឧត្តម អភិបាលខេត្ត ក៏បានបញ្ជាឱ្យអាជ្ញាធរនិងសមត្ថកិច្ចពាក់ព័ន្ធ ក្នុងខេត្តកណ្ដាល ត្រូវបន្តស្រាវជ្រាវបង្ក្រាបបទល្មើស(Online Scam)ឱ្យមានប្រសិទ្ធភាពខ្ពស់។
ឯកឧត្តម គួច ចំរើន បានប្រកាសប្រាប់ប្រជាពលរដ្ឋថា ប្រសិនបើបងប្អូនបានជួបឬប្រទះឃើញទីតាំង(Online Scam)។
សូមផ្ដល់ព័ត៌មានមកកាន់អាជ្ញាធរ ដើម្បីចាត់វិធានការបង្ក្រាប ក្នុងនោះបងប្អូននឹងទទួលបានប្រាក់ លើកទឹកចិត្តចំនួន២.០០០.០០០រៀល និងរក្សាការសម្ងាត់ជូនទៀតផង.!។
*យោងរបាយការណ៍អាជ្ញាធរ បានឱ្យ”ដើមរាំង”ដឹងថា ក្រុងសំពៅពូន ជាក្រុងមួយក្នុងចំណោមក្រុង ស្រុកទាំង១៣ របស់ខេត្តកណ្តាល ត្រូវបានបង្កើត ឡើងតាមអនុក្រឹត្យលេខ២៦៩ ចុះថ្ងៃទី២៣ ខែធ្នូ ឆ្នាំ២០២២ ដោយរាជរដ្ឋាភិបាលកម្ពុជា និងប្រកាសជា ផ្លូវការនៅថ្ងៃទី០២ ខែឧសភា ឆ្នាំ២០២៣។
ក្រុងនេះ មានចម្ងាយប្រមាណ ៦០គីឡូម៉ែត្រ ពីទីរួមខេត្តកណ្តាល និង ប្រមាណ៧១គីឡូម៉ែត្រ ពីរាជធានីភ្នំពេញ មានផ្លូវជាតិឆ្លងកាត់ចំនួន ៣ខ្សែ។
គឺផ្លូវជាតិលេខ២១ នៅត្រើយខាងលិច ផ្លូវខេត្តលេខ១១០ នៅត្រើយខាងកើត និងផ្លូវជាតិលេខ២៣ តភ្ជាប់ក្រុងសំពៅពូន ទៅស្រុកលើកដែក នៃខេត្តកណ្តាល មានព្រំប្រទល់៖ ខាងលិចទល់ពាក់កណ្តាលស្ទឹង នៃស្រុកអង្គរបូរី ខេត្តតាកែវ។
ខាងកើតជាប់ ឃុំក្អមសំណ ឃុំសណ្តារ និងឃុំខ្ពបអាទាវ ស្រុកលើកដែក។
ខាងជើងជាប់ ឃុំព្រែកថ្មី ឃុំកំពង់កុង និងឃុំលើកដែក ស្រុកកោះធំ។
និងខាងត្បូងជាប់ ខេត្តអានយ៉ាង នៃសាធារណរដ្ឋសង្គមនិយមវៀតណាម។
*ក្រុងសំពៅពូន មានសង្កាត់ចំនួន៥ ស្មើនឹង ៥៣ភូមិ មានផ្ទៃដីចាស់២៧ ២៨៩,៣៩ហិកតា ដោយយោងតាមព្រះរាជក្រឹត្យលេខ នស/រកត/០៦២៥/៧៦០ ចុះថ្ងៃទី១២ ខែមិថុនា ឆ្នាំ២០២៥ សម្រេចកាត់ផ្ទៃដីស្រុកអង្គបុរីខេត្តតាកែវ។
ចំនួន ២.៤៧៥,៦១៧៨ ហិកតា ប្រគល់ជូនក្រុងសំពៅពូន និងបានកែសម្រួលព្រំប្រទល់រដ្ឋបាលរវាងក្រុងសំពៅពូន និងស្រុកអង្គរបូរី ខេត្តតាកែវ ចំនួន ២ចំណុច៖
ចំណុចទី១ យល់ស្របឯកភាពកែសម្រួលព្រំប្រទល់នៅចំណុច ស្ទឹងអង្គរបូរី ខេត្តតាកែវមាន ទំហំ ៦,៧១៩៣ ហិកតា មកស្ថិតនៅភូមិពោធិរាម្មា សង្កាត់ព្រែកស្តី ក្រុងសំពៅពូន ចំណុចទី២ យល់ស្របឯកភាពកែសម្រួលព្រំប្រទល់នៅចំណុច ស្ទឹងអង្គរបូរី ខេត្តតាកែវមាន ទំហំ ១៩,៦៣៦២ ហិកតា មកស្ថិតនៅភូមិប្រធាតុ“ក”សង្កាត់ព្រែកស្តី ក្រុងសំពៅពូន ធ្វើឱ្យក្រុងសំពៅពូន មានផ្ទៃដីសរុបចំនួន ២៩.៧៩១,៣៦៣៣ ហិកតា មានគ្រួសារសរុបចំនួន១៧.៦៣៤គ្រួសារ ប្រជាពលរដ្ឋសរុប ៨៣.៥៩៦នាក់ ស្រី៤២.៧៩៧នាក់ ប្រជាពលរដ្ឋអាយុ១៨ឆ្នាំឡើង សរុប៥៤.១៣៤នាក់ ស្រី ២៧ ៣៧៤នាក់។
ក្រុងសំពៅពូន មានព្រំប្រទល់ជាប់នឹងសាធារណរដ្ឋសង្គមនិយមវៀតណាម មានប្រវែងសរុប២៣,១៣២គីឡូម៉ែត្រ ដោយគិតពីព្រំប្រទល់ ឃុំក្អមសំណរ ស្រុកលើកដែក ដល់ពាក់កណ្តាល ព្រែកបាក់ដៃ ខេត្តតាកែវ។
*ក្នុងនោះ មានសង្កាត់ចំនួន២ គឺសង្កាត់ព្រែកជ្រៃ មានព្រំប្រទល់ជាប់នឹងឃុំខាន់បិន និងសង្កាត់សំពៅពូន (ភូមិជ្រៃធំ ភូមិព្រែកស្បូវ) មានព្រំប្រទល់ជាប់នឹងឃុំញ៉ុងហូយ ឃុំខាន់ប៊ិន និងសង្កាត់ជីចឹងឡុងប៊ិញ នៃសាធារណរដ្ឋសង្គមនិយមវៀតណាម។
ក្រុងសំពៅពូន មានច្រកទ្វារព្រំដែនចំនួន០៣ គឺច្រកទ្វារអន្តរជាតិជ្រៃធំ ច្រកទ្វារតំបន់ព្រែកស្បូវ និងច្រកទ្វារតំបន់ព្រែកជ្រៃ-ព្រែកទន្លា។
*លទ្ធផលប្រឡងសញ្ញាបត្រមធ្យមសិក្សាទុតិយភូមិ ក្នុងក្រុងឆ្នាំ សិក្សា២០២៤-២០២៥ ក្នុងឆ្នាំសិក្សា២០២៤-២០២៥ ក្រុងសំពៅពូន មានបេក្ខជនប្រលងសញ្ញាបត្រមធ្យមសិក្សាទុតិយភូមិ ចំនួន ២៨៩នាក់ ស្រី១៥៨នាក់ បេក្ខជនប្រឡងជាប់សរុបចំនួន ២៤៥នាក់ ស្រី ១៣៧នាក់ ស្មើនឹង ៩៣.៥១%នៃចំនួនបេក្ខជនប្រឡងសរុប។
*ក្នុងនោះ បេក្ខជនប្រលងជាប់បាននិទ្ទេសA មានចំនួន ៣នាក់ ស្រី៣នាក់ និទ្ទេស B ចំនួន ២២នាក់ ស្រី១៥នាក់ និទ្ទេស C ចំនួន ៤៩នាក់ ស្រី ៣១នាក់ និទ្ទេស D ចំនួន ១១៤នាក់ ស្រី ៦២នាក់ និងនិទ្ទេស E ចំនួន ៥៧នាក់ ស្រី ២៦នាក់។
វគ្គបំប៉នសិស្សថ្នាក់ទី១២ រយៈពេល១០សប្តាហ៍ ត្រៀមប្រឡងសញ្ញាបត្រធម្យមសិក្សាទុតិយភូមិ សម័យប្រឡង១០សីហា ២០២៦៖
ថ្នាក់វិទ្យាសាស្ត្រពិត ចំនួន៧មុខវិជ្ជា ក្នុង១មុខវិជ្ជា ចំនួន ២ម៉ោង មានគ្រូចំនួន ៧នាក់ មានសិស្សសរុបចំនួន ៧៨នាក់ ស្រីចំនួន ២៨នាក់។
ថ្នាក់វិទ្យាសាស្ត្រសង្គម ចំនួន៧មុខវិជ្ជា ក្នុង១មុខវិជ្ជា ចំនួន២ម៉ោង មានគ្រូចំនួន ៧នាក់ មានសិស្សសរុបចំនួន ២២៦នាក់ ស្រីចំនួន១២១នាក់។
*អំពីសមិទ្ធផលក្នុងវិស័យអប់រំ ដែលសម្ពោធដាក់ឱ្យប្រើប្រាស់នាថ្ងៃនេះ វិទ្យាល័យ ហ៊ុន សែន សំពៅពូន.អគារសិក្សា១ខ្នង បណ្តោយ ៥៦ម៉ែត្រ ទទឹង៩ម៉ែត្រ កំពស់២ជាន់ មាន១២បន្ទប់ សាងសង់រួចរាល់ជាស្ថាពរក្នុងឆ្នាំ២០២២ ចំណាយថវិកាសាងសង់ សរុបចំនួន២៣០.០០០ដុល្លារ ជាអំណោយរបស់ឯកឧត្តមអ្នកឧកញ៉ា កុក អាន និងលោកជំទាវ ស៊ីវ មួយ។
*អគារបណ្ណាល័យ១ខ្នង បណ្តោយ ១៨,២ម៉ែត្រ ទទឹង៩,៥ម៉ែត្រ កំពស់ ១ជាន់ មាន ៤បន្ទប់ សាងសង់រួចរាល់ជាស្ថាពរក្នុងឆ្នាំ២០២៦ ចំណាយថវិកាសាងសង់សរុបចំនួន ៧៣.៤២០ ដុល្លារ ជាអំណោយរបស់លោក ឈួយ សុភាព និងអ្នកស្រី ស៊ាន ឡៃហួយ។
បច្ចុប្បន្ន វិទ្យាល័យ ហ៊ុន សែន សំពៅពូន មានគ្រូក្របខណ្ឌ សរុបចំនួន ៦៧នាក់(៣នាក់មកពីអង្គការគ្រូបង្រៀនដើម្បីកម្ពុជា) ស្រីចំនួន ២៧នាក់ សិស្សសរុបចំនួន ២.១៧៣នាក់ ស្រីចំនួន១.១១៨នាក់។
*សាលាបឋមសិក្សា ពោធិរាម្មា អគារសិក្សា ១ខ្នងបណ្តោយ៤០ម៉ែត្រ ទទឹង ៩ម៉ែត្រ កំពស់១ជាន់ មាន ៥បន្ទប់ សាងសង់រួចរាល់ជាស្ថាពរក្នុងឆ្នាំ២០២៦ ចំណាយថវិកាសាងសង់ សរុបចំនួន ៥៤.៩២៥ ដុល្លារជាអំណោយរបស់អង្គការសប្បុរសធម៌ ហ្វឺស យូនីត (FIRST UNITE CHARITHY ORGANIZATION)។
បច្ចុប្បន្ន សាលាបឋមសិក្សាពោធិរាម្មាមាន គ្រូក្របខណ្ឌសរុបចំនួន១២នាក់ ស្រីចំនួន៦នាក់ គ្រូកិច្ចសន្យា សរុបចំនួន១០នាក់ ស្រី៥នាក់ សិស្សសរុបចំនួន៧៧៧នាក់ ស្រីចំនួន៣៧១នាក់
*សាលាបឋមសិក្សាជ្រោយស្មៅ អគារសិក្សា ១ខ្នង បណ្តោយ៤៨ម៉ែត្រ ទទឹង ៩ម៉ែត្រ កំពស់១ជាន់ មាន ៦បន្ទប់ សាងសង់រួចរាល់ជាស្ថាពរក្នុងឆ្នាំ២០២៦ ចំណាយថវិកាសាងសង់ សរុបចំនួន ៩០.០០០ដុល្លារ.ជាអំណោយរបស់ SINAR GROUP & ANTON FIRMANSYAH FAMILY។
បច្ចុប្បន្ន សាលាបឋមសិក្សាជ្រោយស្មោះ មានគ្រូក្របខណ្ឌសរុបចំនួន ៣នាក់ ស្រី០នាក់ គ្រូកិច្ចសន្យាសរុបចំនួន៤នាក់ ស្រីចំនួន១នាក់ មានសិស្សសរុបចំនួន១៣២នាក់ ស្រីចំនួន ៦៧នាក់។
*សាលាបឋមសិក្សាសំពៅមាស អគារសិក្សា១ខ្នង កម្ពស់១ជាន់ មាន៥បន្ទប់ បានស្ថាបនា រួចរាល់ ចំណាយទឹកប្រាក់សរុបចំនួន៤៥.០០០ ដុល្លារ ជាអំណោយរបស់ឯកឧត្តម អ្នកឧកញ៉ា កុក អាន និងលោកជំទាវ ស៊ីវ ប៊ួយ។
បច្ចុប្បន្ន សាលាបឋមសិក្សាសំពៅមាសមាន គ្រូក្របខណ្ឌសរុបចំនួន១៣នាក់ ស្រី៨នាក់ គ្រូកិច្ចសន្យាសរុបចំនួន៨នាក់ ស្រីចំនួន៨នាក់ មានសិស្សសរុបចំនួន៦១៨នាក់ ស្រី ចំនួន ២៧៧នាក់៕
