ប្រជាជននៅភាគខាងត្បូងប្រទេសលីបង់កំពុងរស់នៅក្នុងភាពភ័យខ្លាច និងការលំបាកកាន់តែខ្លាំង ខណៈការកាន់កាប់របស់អ៊ីស្រាអែល និងការវាយប្រហារជាបន្តបន្ទាប់បានបំផ្លាញភូមិជាច្រើន និងបង្ខំឱ្យប្រជាជនរាប់ពាន់នាក់ភៀសខ្លួន។
ប្រភពពីសារព័ត៌មានTRT World នៅថ្ងៃទី២៤ខែមិថុនា។
អ្នកស្រី Milia el-Cheikh ដែលបានចាកចេញពីភូមិ Dibbine បាននិយាយថា នាងមិនអាចត្រឡប់ទៅផ្ទះរបស់ខ្លួនបានទេ ហើយមិនដឹងថាផ្ទះនោះនៅសល់សភាពបែបណាឡើយ។ នាងបានលើកឡើងថា ការមិនអាចវិលត្រឡប់ទៅផ្ទះវិញ គឺជារឿងឈឺចាប់បំផុត។
នៅតាមតំបន់ជាប់ព្រំដែន អ្នកស្រុកដែលនៅសេសសល់ក៏ប្រឈមនឹងការបិទផ្លូវ ការវាយឆ្មក់ពេលយប់ និងការគំរាមកំហែងផ្នែកសន្តិសុខ។ ស្ថានភាពនេះបានបង្កឱ្យមានភាពតានតឹងរវាងសហគមន៍ផ្សេងៗ និងធ្វើឱ្យជីវភាពរស់នៅប្រចាំថ្ងៃកាន់តែលំបាក។
ប្រជាជនក្នុងតំបន់បារម្ភថា បើស្ថានការណ៍មិនធូរស្រាលទេ ការផ្លាស់ទីលំនៅ និងវិបត្តិមនុស្សធម៌នៅភាគខាងត្បូងលីបង់អាចនឹងកាន់តែធ្ងន់ធ្ងរឡើង៕
