រដ្ឋាភិបាលកាណាដា បានប្រកាសផ្តល់ជំនួយមនុស្សធម៌បឋមចំនួន៥លានដុល្លារអាមេរិក ដើម្បីគាំទ្រការងារសង្គ្រោះបន្ទាន់នៅប្រទេសវេណេស៊ុយអេឡា បន្ទាប់ពីគ្រោះរញ្ជួយដីដ៏សាហាវដែលបណ្តាលឱ្យមានអ្នកស្លាប់ និងការខូចខាតយ៉ាងធ្ងន់ធ្ងរ។
ប្រភពពីសារព័ត៌មានAnadolu Agency នៅថ្ងៃទី២៦ខែមិថុនា។
បើតាមក្រសួងការបរទេសកាណាដា មូលនិធិនេះនឹងត្រូវប្រើប្រាស់សម្រាប់ផ្គត់ផ្គង់ស្បៀងអាហារ ទឹកស្អាត អនាម័យ សេវាសុខាភិបាល ការការពារប្រជាពលរដ្ឋ និងការដឹកជញ្ជូនសម្ភារសង្គ្រោះ តាមរយៈអង្គការមនុស្សធម៌ដែលមានបទពិសោធន៍។
រដ្ឋមន្ត្រីការបរទេសកាណាដា លោកស្រី អានីតា អាណាន់ បានសម្តែងការសោកស្តាយចំពោះការបាត់បង់ជីវិត និងការខូចខាតធ្ងន់ធ្ងរ ដោយអះអាងថា កាណាដានឹងបន្តឈរជាមួយប្រជាជនវេណេស៊ុយអេឡា និងសហការជាមួយដៃគូអន្តរជាតិ ដើម្បីឆ្លើយតបទៅនឹងតម្រូវការមនុស្សធម៌ដែលកំពុងកើនឡើង៕
