សាធារណរដ្ឋប្រជាធិបតេយ្យកុងហ្គោ បានរាយការណ៍ថាអ្នកស្លាប់ដោយសារជំងឺអេបូឡាបានកើនដល់៤៣៨នាក់ ខណៈអ្នកឆ្លងសរុបកើនដល់ ១,៤០៦នាក់ ចាប់តាំងពីការផ្ទុះជំងឺនៅថ្ងៃទី១៥ ខែឧសភា ឆ្នាំ២០២៦។ ក្នុងរយៈពេល ២៤ម៉ោងចុងក្រោយ មានអ្នកស្លាប់ថ្មីជិត ៤០នាក់។
ប្រភពពីសារព័ត៌មានAnadolu Agency នៅថ្ងៃទី២ខែកក្កដា។
ការផ្ទុះជំងឺបានរាលដាលនៅខេត្ត Ituri, Kivu ខាងជើង និង Kivu ខាងត្បូង។ បច្ចុប្បន្ន មានអ្នកជាសះស្បើយ ១៩២នាក់ ខណៈអ្នកជំងឺជាង ៦០០នាក់ កំពុងសម្រាកព្យាបាល ឬដាក់ឱ្យនៅដាច់ដោយឡែក។
អង្គការសុខភាពពិភពលោក (WHO) បានព្រមានថា ចំនួនអ្នកស្លាប់ពិតប្រាកដអាចខ្ពស់ជាងនេះ ដោយសារមានករណីមួយចំនួនកំពុងស្ថិតក្រោមការស៊ើបអង្កេត។ អាជ្ញាធរបញ្ជាក់ថា បញ្ហាអសន្តិសុខ និងការមិនសហការពីប្រជាពលរដ្ឋ កំពុងរារាំងការទប់ស្កាត់ជំងឺ៕
