អង្គការសហប្រជាជាតិ បានប្រកាសការព្រមានកម្រិតខ្ពស់ជុំវិញស្ថានភាពសិទ្ធិមនុស្សនៅទីក្រុង El-Obeidនៃប្រទេសស៊ូដង់ ខណៈមានការព្រួយបារម្ភថា កងកម្លាំងគាំទ្ររហ័ស (RSF) អាចបើកការវាយប្រហារទ្រង់ទ្រាយធំក្នុងពេលឆាប់ៗ។
ប្រភពពីសារព័ត៌មានAl jazeera នៅថ្ងៃទី៤ខែកក្កដា។
ប្រធានសិទ្ធិមនុស្សអង្គការសហប្រជាជាតិ លោក Volker Türk បានថ្លែងនៅក្រុមប្រឹក្សាសិទ្ធិមនុស្សនៅទីក្រុងហ្សឺណែវថា ស្ថានភាពនៅ El-Obeid គឺជាការព្រមានពណ៌ក្រហមដែលតម្រូវឱ្យមេដឹកនាំពិភពលោកចាត់វិធានការជាបន្ទាន់ ដើម្បីទប់ស្កាត់ការកើតឡើងនៃអំពើឃោរឃៅលើជនស៊ីវិល។
លោកបានបញ្ជាក់ថា ប្រជាពលរដ្ឋក្នុងទីក្រុងនេះបានរស់នៅក្រោមការឡោមព័ទ្ធអស់រយៈពេលប្រមាណ ១៨ ខែ និងរងការវាយប្រហារជាបន្តបន្ទាប់ ខណៈកងទ័ពស៊ូដង់ និងកងកម្លាំង RSF កំពុងប្រយុទ្ធដណ្តើមការគ្រប់គ្រងតំបន់៕
