(ភ្នំពេញ)៖នៅព្រឹកថ្ងៃទី០៩,០៧,២០២៦ លោកថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញដឹកនាំកិច្ចប្រជុំផ្ទៃក្នុង ដើម្បីពិភាក្សាលើ (គម្រោងធ្វើទំនើបកម្មប្រព័ន្ធព័ត៌មានឧតុនិយម)នៅទីស្តីការក្រសួង។
លោក ថោ ជេដ្ឋា បញ្ជាក់ថាប្រព័ន្ធព័ត៌មានឧតុនិយមដែលប្រើប្រាស់នាពេលបច្ចុប្បន្ន ត្រូវបានដំឡើង ដាក់ឱ្យដំណើរការតាំងពីឆ្នាំ២០១១ ដែលមានរយៈពេលប្រមាណ ១៥ឆ្នាំមកហើយ។ មកទល់ពេលនេះ ហេដ្ឋារចនាសម្ព័ន្ធផ្នែករឹង (Hardware) និងកម្មវិធីប្រព័ន្ធ (Software) មួយចំនួនមានសភាពចាស់ និងមិនទាន់សម័យ ដែលបង្កជាហានិភ័យខ្ពស់ដល់និរន្តរភាពនៃប្រតិបត្តិការ ព្រមទាំងអាចរំខានដល់ការផ្តល់សេវាឧតុនិយម និងប្រព័ន្ធព្រមានជាមុន (Early Warning System) ដល់វិស័យសំខាន់ៗ រួមមាន៖ ការគ្រប់គ្រងធនធានទឹក កសិកម្ម អាកាសចរណ៍ស៊ីវិល នាវាចរណ៍ ការគ្រប់គ្រងគ្រោះមហន្តរាយ និងវិស័យសេដ្ឋកិច្ចសង្គម។
គម្រោងការធ្វើទំនើបកម្មនាពេលនេះ គឺដើម្បីពង្រឹងស្ថិរភាព បង្កើនប្រសិទ្ធភាព និងក្នុងការផ្តល់ទិន្នន័យ សេវាឧតុនិយមឱ្យកាន់តែមានភាពច្បាស់លាស់ និងទំនុកចិត្តខ្ពស់ ជូនសាធារណជន ក៏ដូចជាវិស័យពាក់ព័ន្ធផ្សេងៗ៕
