ទឹកជំនន់ធ្ងន់ធ្ងរ និងការបាក់អាងស្តុកទឹកនៅភាគខាងត្បូងប្រទេសចិន បានបណ្តាលឱ្យមនុស្សយ៉ាងហោចណាស់៣៩នាក់ស្លាប់ និង៩នាក់ទៀតបាត់ខ្លួន នៅតំបន់ស្វយ័តក្វាងស៊ីជួង ដែលមានព្រំដែនជាប់ប្រទេសវៀតណាម។
ប្រភពពីសារព័ត៌មានAnadolu Agency។
អាជ្ញាធរមូលដ្ឋានបានឱ្យដឹងថា ការបាក់អាងស្តុកទឹក Liulan នៅទីក្រុង Nanning បានបង្កការខូចខាតយ៉ាងធ្ងន់ធ្ងរ ខណៈក្រុមជួយសង្គ្រោះកំពុងបន្តប្រតិបត្តិការស្វែងរកអ្នកបាត់ខ្លួន និងផ្តល់ជំនួយដល់ប្រជាពលរដ្ឋដែលរងផលប៉ះពាល់។
គ្រោះមហន្តរាយធម្មជាតិនេះកើតឡើង បន្ទាប់ពីតំបន់ជាច្រើននៅប្រទេសចិនបានរងនូវភ្លៀងធ្លាក់ខ្លាំង ព្យុះផ្គររន្ទះ ទឹកជំនន់ និងការរអិលបាក់ដី។ នៅខេត្ត Gansu ភាគពាយ័ព្យប្រទេសចិន ក៏មានមនុស្សយ៉ាងហោចណាស់ ២១ នាក់ស្លាប់ផងដែរ ដោយសារការរអិលបាក់ដីវាយប្រហារភូមិមួយ៕
