រូម៉ានីបានបាញ់ទម្លាក់ដ្រូនមួយគ្រឿង ដែលបានហោះចូលដែនអាកាសរបស់ខ្លួនជាលើកទី២ ក្នុងរយៈពេលតែ២ថ្ងៃ។ ហេតុការណ៍នេះកើតឡើងនៅតំបន់ជិតព្រំដែនអ៊ុយក្រែន ខណៈសង្គ្រាមរវាងរុស្ស៊ី និងអ៊ុយក្រែនកំពុងបន្តកាន់តែខ្លាំង។
ប្រភពពីសារព័ត៌មានTRT World នៅថ្ងៃទី២៥ខែកក្កដា។
ក្រសួងការពារជាតិរូម៉ានីបានបញ្ជូនយន្តហោះចម្បាំង F-16 ចំនួន២គ្រឿង ដើម្បីស្ទាក់ចាប់ដ្រូន មុនពេលបាញ់ទម្លាក់វា។ ដ្រូននេះបានហោះចូលតំបន់ជិតទីក្រុង Sfantu Gheorghe ក្នុងតំបន់ដងទន្លេដានូប។
អាជ្ញាធររូម៉ានីមិនទាន់បញ្ជាក់ថា ដ្រូនដែលត្រូវបាញ់ទម្លាក់នៅថ្ងៃសៅរ៍ ជារបស់ប្រទេសណានោះទេ។ ប៉ុន្តែដ្រូនដែលត្រូវបានបាញ់ទម្លាក់មួយគ្រឿងកាលពីថ្ងៃសុក្រ ត្រូវបានបញ្ជាក់ថា ជាដ្រូនរបស់រុស្ស៊ី។ ករណីនេះធ្វើឱ្យមានការព្រួយបារម្ភកាន់តែខ្លាំងអំពីសុវត្ថិភាពតំបន់ព្រំដែនភាគខាងកើតរបស់ NATO៕
