(ភ្នំពេញ)៖ ក្មេង១ក្រុមដើរលេងនៅក្នុងវត្ត ស្រាប់តែប្រទេះឃើញកាបូបស្ពាយពណ៌ខ្មៅ១ នៅក្រោមដើមពោធិ៍ក្បែរស្រះទឹក ខណៈពួកគេក៏រើសយកមកបើកមើលក៏ប្រទះឃើញកាំភ្លើងខ្លី១ដើម ព្រមទាំងបង់កាំភ្លើងចំនួន២ ដែលមានគ្រាប់ពេញ រួចក៏ប្រាប់អាជ្ញាធរនិងសមត្ថកិច្ចឲ្យទៅពិនិត្យ។
ហេតុការណ៍នេះបានកើតឡើងនៅព្រឹកថ្ងៃទី២៧,០៧,២០២៦ នៅក្រោមដើមពោធិ៍វត្តទួល សុភាឃួន ភូមិព្រៃទា២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
កម្លាំងប៉ុស្តិ៍នគរបាលចោមចៅទី៣ បានឱ្យដឹងថា មានក្មេងៗ១ក្រុមបានដើរលេងនៅក្នុងវត្តទួល សុភាឃួននោះ ហើយពេលទៅដល់ចំណុចកើតហេតុ បានប្រទះឃើញកាបូបស្ពាយពណ៍ខ្មៅ១នៅក្រោមដើមពោធិ៍ហើយមានកាំភ្លើងខ្លីនៅក្នុងនោះ១ដើមផង។
ក្រោយពេលដឹងរឿងនោះភ្លាម កម្លាំងនគរបាលប៉ុស្តិ៍ ក៏ចុះទៅពិនិត្យមើល ហើយពិតជាបានឃើញកាំភ្លើងខ្លីម៉ាកប៉េអាកុល១ដើមនៅក្នុងកាបូបនោះមែន ហើយក៏មានបង់កាំភ្លើងម៉ាកនោះចំនួន២ ដែលមានគ្រាប់សរុបចំនួន១៦គ្រាប់ និងប័ណ្ណសម្គាល់អាវុធខ្លីសមូហភាព១សន្លឹកផងដែរ ។
កម្លាំងនគរបាល បានប្រាប់ឲ្យដឹងទៀតថា នៅក្នុងប័ណ្ណសម្គាល់អាវុធខ្លីសមូហភាព១សន្លឹកនោះមានលេខចុះបញ្ជី បខ៣៣៣៥ កពជ កងឯកភាពបញ្ជាការដ្ឋានកាំភ្លើងធំ អ.ប ក អាវុធខ្លីM1991A1 លេខ825574។
ប៉ុន្តែចំពោះប័ណ្ណសម្គាលអាវុធខ្លីនេះបានហួសសុពលភាព ប្រើប្រាស់រយៈពេល៧ខែទៅហើយ ដោយថ្ងៃចេញប័ណ្ណ០២.០១.២០២៥ និងថ្ងៃផុតកំណត់០២.០១.២០២៦ ។
ក្នុងនោះកម្លាំងនគរបាល ពុំទាន់ស្រាវជ្រាវដឹងថាការយកកបូបមានទាំងកាំភ្លើងខ្លីទៅប្លុងបែបនេះ ព្រោះតែចោរលួចកាបូបរបស់មន្រ្តីយោធាណាម្នាក់ រួចយកតែប្រាក់ហើយបោះចោលកាបូបនិងកាំងភ្លើង ឬក៏ជាករណីអ្វីនៅឡើយទេ។
ក្រោយពេលធ្វើការពិនិត្យទីតាំងកើតហេតុនិងតំបន់ជុំវិញទីនោះរួចមក នគរបាលក៏បាននាំយកកាំភ្លើង បង់កាំភ្លើងនិងគ្រាប់ ព្រមទាំងប័ណ្ណសម្គាលអាវុធខ្លីនោះទៅរក្សាទុកនៅប៉ុស្តិ៍រង់ចាំការស្រាវជ្រាវបន្តទៀត៕
