(ភ្នំពេញ)៖ កាលពីថ្ងៃទី៣១ ខែកក្កដា ឆ្នាំ២០២៦ គណៈបញ្ជាការឯកភាពរដ្ឋបាលខណ្ឌដង្កោ ដឹកនាំដោយលោកស្រី គឹម ញឹប អភិបាលខណ្ឌដង្កោបានបន្តចុះត្រួតពិនិត្យជនបរទេសស្នាក់នៅតាម បុរីច័ន្ទគិរី, បុរីពិភពថ្មីកួរស្រូវ១, បុរីពិភពថ្មីកួរស្រូវ២, បុរីពិភពថ្មីកួរស្រូវ៣, បុរីជីប ម៉ុង ៥០ម៉ែត្រ និងបុរីប៉េង អ៊ីម ក្នុងគោលដៅប្រតិបត្តិការបោសសម្អាតតបទល្មើសឆបោកតាមប្រព័ន្ធបច្ចេកវិទ្យា(Online Scams)នៅក្នុងភូមិសាស្ត្រខណ្ឌដង្កោ។
ការចុះប្រតិបត្តទីតាំងទាំងអស់នេះ ពុំមានលួចលាក់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា(Online Scams)នោះទេ។
ទន្ទឹមនឹងនេះ រដ្ឋបាលខណ្ឌដង្កោ ក៏បានចេញសេចក្តីបំភ្លឺព័ត៌មាន ដល់បងប្អូនប្រជាពលរដ្ឋសាធារណជន និងអ្នកសារព័ត៌មានទាំងអស់ឱ្យជ្រាប ដូចខាងក្រោម៖
នាេពលថ្មីៗនេះ រដ្ឋបាលខណ្ឌដង្កោ បានឃើញការបង្ហោះផ្សាយនូវព័ត៌មានលើទំព័រហ្វេសប៊ុកឈ្មោះ(Taing Sarada)ដែលមានខ្លឹមសារ៖ “ប្រភពពីពលរដ្ឋឱ្យដឹងថា សមត្ថកិច្ចខណ្ឌដង្កោកំពុងលាក់ពួន scammers នៅតាមបុរីជាច្រើន”។
ក្នុងនោះរដ្ឋបាលខណ្ឌដង្កោ សូមជម្រាបជូនបងប្អូនប្រជាពលរដ្ឋ សាធារណជន និងអ្នកសារព័ត៌មានទាំងអស់ជ្រាបថា៖ រដ្ឋបាលខណ្ឌបានចុះផ្សព្វផ្សាយអនុក្រឹត្យលេខ០៣ អនក្រ.បក ស្តីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្តុំជូនដល់ម្ចាស់ទីតាំងបុរី ផ្ទះល្វែង ឃ្លាំង ផ្ទះសំណាក់ សណ្ឋាគារ ក្រុមហ៊ុន រោងចក្រ សហគ្រាស និង អាជីវកម្មដ្ឋាននានា ព្រមទាំងបានចុះត្រួតពិនិត្យរដ្ឋបាលនៅតាមទីតាំងមានជនបរទេសស្នាក់នៅរួមមាន៖ លំនៅឋាន និង បុរីនានាក្នុងគោលដៅបោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា(Online Scams)ក្នុងភូមិសាស្ត្រខណ្ឌ ជាប់ជាប្រចាំ ជាច្រើនលើក ច្រើនសារនិងមិនដែលធ្វេសប្រហែសឡើយ តែមិនបានរកឃើញនូវ បទល្មើសអ្វីដូចការចោទប្រកាន់ខាងលើនោះទេ។
រដ្ឋបាលខណ្ឌ មិនអាចទទួលយកនូវការចោទប្រកាន់ខាងលេីដោយគ្មានមូលដ្ឋានពិតប្រាកដនិងគ្មានភស្តុតាងណាមួយ តាមរយៈការបង្ហោះរបស់ហ្វេសប៊ុកខាងលើនោះទេ។
ពេលនោះដែរ រដ្ឋបាលខណ្ឌដង្កោ បានលើកទឹកចិត្តដល់បងប្អូនប្រជាពលរដ្ឋ និងសាធារណជនទាំងអស់ ចូលរួមសហការផ្តល់ព័ត៌មានអំពីទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា(Online Scams)មកកាន់ អាជ្ញាធរមានសមត្ថកិច្ចនៅជិតបំផុត ឬតាមរយៈលេខទូរស័ព្ទ៖ ០៨៩ ៩៧៨ ៨៨៨, ០១២ ៧២៧ ៣៥៨ និង០១១ ៦៣៣ ១៦៨ ឬតាមរយៈផេកហ្វេសប៊ុកផ្លូវការ (https://www.facebook.com/share/177X2xaNbi/) ដើម្បីឱ្យកម្លាំងគណៈបញ្ជាការ ឯកភាពរដ្ឋបាលខណ្ឌចុះបង្ក្រាបបទល្មើសបានទាន់ពេលវេលា ដោយរដ្ឋបាលខណ្ឌនឹងរក្សាការសម្ងាត់ជូន។
ហេតុនេះហេីយ សូមបងប្អូនប្រជាពលរដ្ឋ សាធារណជន និងអ្នកសារព័ត៌មានទាំងអស់ជ្រាប និងកុំមានការភាន់ច្រឡំ៕

